Тошкент, Ўзбекистон (UzDaily.uz) — 2025 йил 17 июль куни Фармацевтика тармоғини ривожлантириш агентлиги директори Абдулла Азизов ва Испаниянинг "Galenicum" компанияси вакили билан учрашув бўлиб ўтди.

"Galenicum" - 2003 йилда Испаниянинг Барселона шаҳрида ташкил этилган халқаро фармацевтика компаниясидир. Компания дори воситаларини яратиш - R&D, ишлаб чиқариш, рўйхатдан ўтказиш ва дистрибуция қилиш каби фаолиятнинг тўлиқ циклларини ўз ичига олади. Бугунги кунда "Galenicum" дунё бўйлаб 50 дан ортиқ мамлакатларда фаолият юритади. Компаниянинг йиллик айланмаси 300 миллион евродан ортиқни ташкил этиб, 800 дан зиёд мутахассисни иш билан таъминлаган.

Мулоқот доирасида "Galenicum" компанияси мамлакатимиздаги фаолиятини маҳаллийлаштириш, яъни дори воситаларини Ўзбекистон ҳудудида ишлаб чиқаришни ташкил этиш, технологик трансферни амалга ошириш ва тўғридан-тўғри инвестиция киритиш йўли орқали маҳаллий фармацевтика салоҳиятини мустаҳкамлаш ҳамда узоқ муддатли стратегик ҳамкорликни йўлга қўйиш ниятида эканини билдирди.

Агентлик директори "Galenicum" компаниясининг Ўзбекистон фармацевтика бозорига кириб келиш ташаббусини қўллаб-қувватлаб, ушбу жараёнда ҳар томонлама институционал кўмак кўрсатишга тайёрлигини билдирди.