«Ишонч» жамғармаси узоқ ҳудудлардаги мактаблар инфратузилмасини яхшилаш учун $20 млн йўналтиради

Тошкент, Ўзбекистон (UzDaily.uz) — «Ишонч» жамғармаси 20 миллион АҚШ доллари миқдоридаги янги ташаббусни ишга туширди. Лойиҳа узоқ ҳудудларда жойлашган 45 та мактабда сув таъминоти, санитария, иситиш тизимлари ва энергия самарадорлигини модернизация қилишга қаратилган.

Бу ташаббус 31 мингдан ортиқ болани қамраб олиб, улар учун қулай ва хавфсиз ўқув шароитларини яратади. Молиялаштириш коррупция билан боғлиқ жиноят ишлари доирасида Ўзбекистонга қайтарилган маблағлар ҳисобидан амалга оширилмоқда.

Эслатиб ўтамиз, “Ишонч” жамғармаси 2022 йилда Швейсария ва Ўзбекистон ўртасида ўзбек халқи манфаатлари йўлида ноқонуний йўллар билан қўлга киритилган мулкларни қайтариш бўйича реституция келишуви доирасида ташкил этилган.

Бугунги кунга қадар Жамғарма ихтиёрида 313 миллион доллар мавжуд бўлиб, уларнинг 87 миллион доллари сифатли соғлиқни сақлаш ва таълим хизматларидан фойдаланиш имкониятларини кенгайтириш дастурларига йўналтирилган.

Жамғарма фаолияти БМТ ва Активларни қайтариш бўйича Глобал форум (GFAR) тамойилларига асосланган бўлиб, улар очиқлик, ҳисобдорлик, иштирок ва жамоат манфаатларини ҳимоя қилишни назарда тутади.

Унинг бош мақсади — реституция жараёни амалиётга йўналтириш, ўз вақтида ва адолатли бўлишини ҳамда қайтарилган маблағлар Ўзбекистон фуқароларига сезиларли фойда келтиришини таъминлашдан иборат.