Ироқлик тадбиркорлар Самарқандда тўқимачилик корхонаси фаолияти билан танишдилар

Тошкент, Ўзбекистон (UzDaily.uz) — Самарқанд шаҳрига амалий ташриф билан келган Ироқ тадбиркорларидан иборат делегация ташриф доирасида PARISA HOME («SAM RAFOAT TEKSTIL» МЧЖ) корхонасида бўлди. Ушбу корхона юқори сифатли маҳсулотлар ва матолар ишлаб чиқаришга ихтисослашган маҳаллий ишлаб чиқарувчилардан бири ҳисобланади.

Ташриф давомида меҳмонлар корхонанинг ишлаб чиқариш қувватлари, технологик жараёнлари, маҳсулотлар ассортименти, шунингдек сифатни таъминлаш ва экспортга йўналтирилган ёндашувлари билан яқиндан танишдилар.

Учрашувда томонлар ўзаро ҳамкорлик истиқболлари, PARISA HOME маҳсулотларини Ироқ бозорига чиқариш имкониятлари ҳамда узоқ муддатли шериклик шаклларини муҳокама қилдилар.

Тўқимачилик корхонасига ташриф Ўзбекистон ва Ироқ тадбиркорлари ўртасида тўғридан-тўғри бизнес алоқаларини мустаҳкамлаш, экспорт салоҳиятини ошириш ва саноат кооперациясини ривожлантиришга қаратилган дастурнинг муҳим қисми бўлди.