Тошкент, Ўзбекистон (UzDaily.uz) — Жорий йил 13 февраль куни Ўзбекистон Савдо-саноат палатаси раиси Даврон Вахабов Иорданиянинг Аммон шаҳрида бўлиб, Classic Fashion Apparel Industry Ltd. Co. компаниясига ташриф буюрди. 

Компанияга 2003 йилда асос солинган бўлиб, Яқин Шарқ ва Шимолий Африка минтақасидаги энг йирик кийим-кечак ишлаб чиқарувчиси ҳисобланади. Иордания бўйлаб 20 та замонавий фабрика мавжуд бўлиб, улар кунига 500 мингта кийим ишлаб чиқаради. Ходимлар сони 30 мингдан ортиқ.

Дунё миқёсидаги Walmart, Adidas, Reebok, Hanes, Nautica, Hollister, Kirkland ва Gerry каби йирик брендлар билан ҳамкорлик қилади.

Ташриф давомида корхонанинг ишлаб чиқариш жараёни билан яқиндан танишилди ҳамда икки томон ўртасида ҳамкорлик истиқболлари муҳокама қилинди. 

Жумладан, бўялган мато экспортини йўлга қўйиш имкониятлари атрофлича муҳокама қилиниб, халқаро бозор талаблари, логистика масалалари ва маҳсулот рақобатбардошлигини ошириш йўналишлари бўйича фикр алмашилди. Шунингдек, экспорт жараёнини соддалаштириш ва самарадорлигини оширишга оид таклифлар кўриб чиқилди.