Тошкент, Ўзбекистон (UzDaily.uz) — 1–3 февраль кунлари Ташқи ишлар вазири Бахтиёр Саидов бошчилигидаги мамлакатимиз делегацияси Иорданиянинг Аммон шаҳрида бўлиб турибди.

Ташриф доирасида Ўзбекистон Савдо-саноат палатаси раиси ўринбосари Дилшод Расулов Иордания Савдо-саноат палатаси биринчи вице-президенти Жамаль Аль-Рифаи билан учрашди.

Иорданиянинг саноат салоҳияти асосан фармацевтика, кимё саноати, тўқимачилик, ўғитлар ишлаб чиқариш ва қурилиш материаллари каби соҳаларда намоён бўлади. Мамлакат фосфат ва калий захиралари билан машҳур бўлиб, уларнинг экспорти иқтисодиётда муҳим ўрин тутади. Шунингдек, қайта ишлаш ва озиқ-овқат саноати ҳам тез ривожланмоқда.

Учрашувда давомида икки мамлакат ишбилармон доиралари ўртасида ўзаро манфаатли ҳамкорликни ривожлантириш, бизнес ташрифлар ва қўшма тадбирлар ташкил этиш, саноат кооперациясини кенгайтириш ҳамда янги инвестиция лойиҳаларини амалга ошириш бўйича долзарб масалалар муҳокама қилинди.

Учрашув якунлари бўйича Ўзбекистон Савдо-саноат палатаси ва Иордания Савдо-саноат палатаси ўртасида илк бор англашув тўғрисида меморандум имзоланди. Мазкур ҳамкорлик икки мамлакат тадбиркорлари учун янги имкониятлар эшигини очиб, ўзаро манфаатли савдо-иқтисодий ҳамкорликни ўрнатишга хизмат қилади.