Instagram ва Telegram саҳифалари эгаси ахлоққа зид контент жойлаштиргани учун жавобгарликка тортилди

Тошкент, Ўзбекистон (UzDaily.uz) — Ўзбекистон Республикаси Рақобатни ривожлантириш қўмитаси ахлоқ ва одоб-ахлоқ меъёрларига зид видеороликлар эълон қилинган ижтимоий тармоқ саҳифалари эгасига нисбатан чоралар кўрилгани ҳақида хабар қилди.

Текширув жараёнида «KAMOLA YULDASHEVNA KOSMETOLOG» номи остидаги Instagram ва Telegram саҳифалари орқали миллий ва оилавий анъаналарга, шунингдек, умумқабул қилинган ахлоқ меъёрларига зид бўлган ҳаракатлар, образлар ва ифодалар акс этган видеоматериаллар жойлаштирилгани аниқланди. Ушбу ҳолат жамоатчилик орасида кенг муҳокамага сабаб бўлди.

Саҳифалар эгаси — Худойқулова Камола Йўлдош қизи — га нисбатан қонунбузарлик бўйича маъмурий баённома тузилиб, судга юборилди.

Идорада қайд этилишича, қоидабузарлик такрорланадиган бўлса, материаллар ҳуқуқий баҳо бериш учун ҳуқуқни муҳофаза қилувчи органларга тақдим этилади.

Қўмита Ўзбекистон Республикасининг «Реклама тўғрисида»ги қонуни 16-моддасига мувофиқ рекламада миллий ва оилавий анъаналарга, шунингдек, умумқабул қилинган ахлоқ ва одоб-ахлоқ меъёрларига зид бўлган шакллар, ифодалар ва образлардан фойдаланиш тақиқланишини яна бир бор эслатди.