Тошкент, Ўзбекистон (UzDaily.uz) — Миллий истиқболли лойиҳалар агентлиги (ИЛМА) машҳур молиявий эксперт Отабек Бакировга нисбатан Тошкент шаҳар ИИБга ариза билан мурожаат қилди. Бу ҳақда Бакиров ўзининг Telegram-канали орқали маълум қилди.

Унинг айтишича, бу мурожаатга сабаб Бакировнинг Хитойнинг Temu онлайн маркетплейси Ўзбекистонда блокланиши муносабати билан эълон қилган «Қонунсиз суперрегулятор» сарлавҳали пости бўлган. Унда Бакиров агентлик ваколатларининг кенгайишини танқид қилиб, уни тегишли қонуний асосларсиз мегарегуляторга айланганини таъкидлаган.

Бакировнинг таъкидлашича, ариза ИЛМАнинг биринчи директори ўринбосари Вячеслав Пак томонидан имзоланган, унга агентликнинг ишончли вакили томонидан ёзилган тушунтириш хати ҳам илова қилинган. Ҳозирда иш Тошкент шаҳар ИИБ киберхавфсизлик бўлими томонидан кўриб чиқилмоқда. Кечқурун Бакиров чақирув қоғозини қабул қилиб, ёзма ва оғзаки тушунтириш берган. Бироқ, иш бўйича ҳужжатлар нусхаси унга тақдим этилмаган.

Ўз постида Бакиров ИЛМА амалда суғурта, капитал бозори, криптоактивлар, электрон тижорат бозорларини тартибга солишини, ва қарийб қимор ўйинлари соҳасини ҳам ўз назоратига олишга тайёрланаётганини айтди. У бу ваколатлар қонуний расмийлаштирилмасдан берилаётганини, агентлик катта маъмурий ресурсларга эга эканини таъкидлади.

«Биз тизимни қонун устуворлигига эмас, балки „ишончли одамлар“га қурдик», — деди Бакиров. Шунингдек, у агентлик фаолиятида манфаатлар тўқнашувини тартибга солувчи нормалар мавжуд эмаслигини қайд этди.

Янги изоҳида у яна бир бор ИЛМА фаолиятини тартибга солувчи махсус қонун қабул қилиш зарурлигини таъкидлади.

Унинг сўзларига кўра, конструктив танқидни обрўсизлантириш деб қабул қилиш мумкин эмас. «Судга арз қилиш ўрнига, раҳмат айтиш керак», — дея таъкидлади у.

Бакиров, шунингдек, АҚШ, Норвегия, Украина ва Россиядан фарқли ўлароқ, Ўзбекистонда мегарегулятор фақат қарорлар ва топшириқлар асосида иш олиб бораётганини, бу эса нафақат бозор ва инвесторлар, балки регуляторнинг ўзи учун ҳам хавф солишини қайд этди.