Тошкент, Ўзбекистон (UzDaily.uz) — 10 февраль куни Тошкент шаҳар жиноят ишлари бўйича Юнусобод туман суди пойтахтликларни ижтимоий тармоқларда ҳақорат қилганликда айбланган 24 ёшли Н.Х.нинг ишини кўриб чиқди.

Суд материалларига кўра, Н.Х. ўзининг Instagram'даги ёпиқ саҳифасида 5 февраль куни пойтахтликларни ҳақорат қилувчи 3–4 та видеоролик жойлаштирган ва уларни беш дақиқа ичида ўчириб ташлаган.

Жавобгарнинг айтишича, унинг бундай ҳаракат қилиш сабаби таксичи билан бўлган тортишувга бориб тақалади. Унинг сўзларига кўра, таксичи унга «Сизлар ҳайвонларсиз. Сизлар келганингиздан бери Тошкентда доимий тирбандлик. Аммо сен қиз бола бўлганинг учун нархни арзонроқ айтаман», деган.

Бу сўзларга қаттиқ аччиқланган Н.Х. таксичиларнинг баъзи бирларига қаратилган ғазабли мурожаатни видеога ёзиб қолдирган. Бироқ блогерлар унинг видеосидан фрагментлар тарқатиб, ундаги сўзлар кенг жамоатчиликка тарқалган.

Судда Н.Х. тўрт марта наркоз олгани туфайли руҳий ҳолатига салбий таъсир қилганини ва уни тез асабийлашувчан қилиб қўйганини айтди. У ўша пайтда ўзини ҳақ деб ҳисоблагани ва ҳатто «Мени 15 суткага қамашса ҳам, аҳамияти йўқ, мен ҳақиқатни айтдим», деганини тан олди. Бироқ тергов жараёнида у айбини тўлиқ тан олди ва суддан енгил жазо тайинлашини сўради.

Маҳалла фаоллари — Юнусобод туманидаги «Богиэрам» ва «Боғишамол» маҳаллалари раислари унинг гапларини ҳақорат деб ҳисоблаб, суддан қонунга мувофиқ чора кўришни сўрашди. «Богиэрам» маҳалласи раиси бундай ҳолатлар жазосиз қолса, ўзбошимчаликка сабаб бўлиши мумкинлигини таъкидлади.

Суд иш материалларини кўриб чиқиб, Н.Х.ни Маъмурий жавобгарлик тўғрисидаги кодекснинг 183-моддаси (майда безорилик) бўйича айбдор деб топди ва унга 10 сутка маъмурий қамоқ жазосини тайинлади. Шунингдек, у махсус қабулхонада бўлган ҳар бир куни учун базавий ҳисоблаш миқдорининг 15% (56250 сўм) миқдорида кунлик харажатларни тўлайди.