Ижтимоий карта орқали харид қилинган товарлар бўйича ҚҚСни қайтариш соддалаштирилади

Тошкент, Ўзбекистон (UzDaily.uz) — Ҳукумат қарори билан “Кам таъминланган ёки камбағал оилаларнинг вакиллари бўлган жисмоний шахслар томонидан ижтимоий карта орқали харид қилинган айрим турдаги товарлар (хизматлар) бўйича қўшилган қиймат солиғи суммасини қайтариш тартиби тўғрисида”ги вақтинчалик низом тасдиқланди.

Низомга кўра, айрим турдаги товарлар (хизматлар) ижтимоий карта орқали харид қилинганда, солиқ суммаси ойига БҲМнинг 10 бараваригача бўлган харидлар суммаси доирасида қайтарилади.

Солиқ қўмитаси автоматлаштирилган дастур орқали аниқланган солиқ суммаси бўйича буюртмани ижтимоий картадан тўловлар амалга оширилган кунда Иқтисодиёт ва молия вазирлигига тақдим этади.

Иқтисодиёт ва молия вазирлиги Ғазначилик хизмати қўмитасига Солиқ қўмитасининг махсус ҳисобварағига буюртма олган кунда тўланган солиқ суммасини қайтариб бериш учун маблағларни ўтказади.

Солиқ қўмитаси солиқ суммаси қайтарилиши тасдиқланган жисмоний шахсларнинг реестрини ваколатли банкка 1 иш кунида тақдим этади.

Ваколатли банк пул маблағларини 1 иш кунида солиқ суммаси қайтарилиши тасдиқланган жисмоний шахсларнинг ижтимоий карталарига ўтказади.