Тошкент, Ўзбекистон (UzDaily.uz) — Жорий йилнинг 15 январь куни Туркиянинг “IC İçtash İnşaat” компанияси бошқарув кенгаши аъзоси Реха Денемеч ҳамда Ўзбекистон Республикаси Бош вазири ўринбосари – Иқтисодиёт ва молия вазири Жамшид Қўчқоров ўртасида учрашув бўлиб ўтди.

Учрашувда компаниянинг “IC İçtash İnşaat” қурилиш бизнесини ривожлантириш бўйича бош директори Егемен Илкин ҳамда Ўзбекистон Республикаси Иқтисодиёт ва молия вазири ўринбосари Илҳомжон Умрзаков, Транспорт вазири ўринбосари Илҳомжон Абдугафаров, Автомобиль йўллари қўмитаси раиси Жамшид Турсунов ва бошқа масъул вакиллар иштирок этди.

Компания 55 йиллик тажриба эга бўлиб, автомобиль йўллар, туннеллар, кўприклар ҳамда турли йирик иншоотларни нафақат Туркияда, балки хорижий давлатларда ДХШ асосида муваффақиятли барпо этган. Компания томонидан ДХШ асосида Истанбул шаҳрида умумий узунлиги 150 км автомобиль йўли, денгиз устида 1,5 км узунликдаги “Yavuz Sulton Salim” номли босфор кўприги қурилган, шунингдек, амалга оширилаётган йирик лойиҳа қаторига Ветнамда қурилаётган янги аэропортни киритиш мумкин.

Мулоқот давомида томонлар ўртасида давлат-хусусий шериклик дастурлари асосида транспорт инфратузилмасини такомиллаштириш, хусусан, автомобиль йўлларини қуриш ва модернизация қилиш, турк компаниясининг соҳадаги тажрибаси, жумладан, автомобиль йўллари, кўприклар ва аэропортлар қуриш йўналишида шакллантирилган лойиҳалари юзасидан муҳокамалар бўлиб ўтди.

Суҳбат давомида томонлар икки мамлакат ўртасида сўнгги йилларда ДХШ лойиҳалари бўйича ҳамкорлик катта суръатларда ривожланиб бораётганини мамнуният билан таъкидлаб, Самарқанд, Бухоро ва Навоий вилоятларидан ўтувчи янги Самарқанд-Бухоро тезюрар пуллик автомобиль йўлини қуриш мақсадида Автомобиль йўллари қўмитаси билан Англашув Меморандуми имзоланди.

Шунингдек, муҳокамалар давомида томонлар давлат-хусусий шерикликни ривожлантиришдаги асосий йўналишлар, амалга оширилаётган ДХШ лойиҳалари, ДХШ механизмларидан самарали фойдаланиш, соҳада жаҳоннинг илғор ва муваффақиятли тажрибаларидан кенг фойдаланиш юзасидан фикр алмашди.

Музокаралар якунида томонлар ўзаро манфаатли ҳамкорлик алоқаларини ривожлантириш ҳамда белгиланган мақсадларга етишда тизимли ва самарали фаолият олиб боришга келишиб олдилар.