«Ҳудудгаз Қашқадарё» директори тадбиркорга 2,6 млрд сўмни қайтармагани учун жаримага тортилди

Тошкент, Ўзбекистон (UzDaily.uz) — «Ҳудудгаз Қашқадарё» газ таъминоти филиали раҳбари Улуғбек Эрназаров тадбиркорга 2,6 млрд сўмни қайтармагани учун жаримага тортилди, деб хабар қилди Президент ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил матбуот хизмати.

Ҳодиса тадбиркор «Ҳудудгазтаъминот» бошқаруви раиси Маруфхон Хўжаевга қонуний равишда маблағларни қайтаришга кўмак сўраб мурожаат қилганидан сўнг ижтимоий тармоқларда кенг муҳокамага сабаб бўлди.

Мурожаатда филиал ходимлари Сурхондарё вилояти прокуратураси терговчисининг пул маблағларини қайтариш мажбуриятини юкловчи қарорини эътиборсиз қолдираётгани қайд этилган.

«Ҳудудгаз Қашқадарё» матбуот хизмати билдиришича, шикоят Сурхондарё вилояти прокуратурасининг 2025 йил 29 июлдаги қарори юзасидан Бош прокуратурага қайта юборилган.

Вазиятга Бизнес-омбудсман ҳам изоҳ бериб, жиноят иши тугатилганига ва маблағларни қайтариш бўйича кўрсатма берилганига қарамай, пуллар қайтарилмаганини тасдиқлади.

Текширув натижаларига кўра, Маъмурий жавобгарлик тўғрисидаги кодекснинг 241–9-моддаси асосида, яъни пул маблағларини қонунга хилоф равишда ўтказиш ёки ечиб олиш, шунингдек уларни ўз вақтида қайтармаслик ҳолати бўйича маъмурий баённома расмийлаштирилди.

Суд филиал директорини 20 та базавий ҳисоблаш миқдори, яъни 8,24 млн сўм миқдорида жаримага тортиш тўғрисида қарор чиқарди. Идорада ҳозирда тадбиркорнинг ҳисоб рақамига маблағларни ўтказиш бўйича чоралар кўрилаётгани маълум қилинди.