Тошкент, Ўзбекистон (UzDaily.uz) — Жорий йил 24-26 февраль кунлари "Ўзтўқимачиликсаноат" уюшмаси раиси ўринбосари А. Содиков бошчилигидаги ишчи гуруҳ Грузия давлатига ташрифи амалга оширилди. 

Ташриф давомида қатор компаниялар билан учрашув ва музокаралар амалга оширилди. Жумладан, Грузиянинг “Makratelli”, “Situationist”, “BOLDI” va “Maroma Collection”тўқимачилик компанияси билан мато ва газлама етказиб бериш бўйича дастлабки келишувга эришилди. Бундан ташқари, “Overdose” компанияси билан музокаралар якуни бўйича хориж томони тақдим этган модель асосида тайёр маҳсулотларни ишлаб чиқариш имкониятларини кўришга келишиб олинди. 

Грузияда тўқимачилик маҳсулотларини ишлаб чиқаришни ташкил этиш имкониятларини ўрганиш мақсадида, ташрифнинг иккинчи кунида “Poti” эркин иқтисодий зонасига ўзбек корхоналари билан ташриф ташкил этилди. 

Унда "EIZ" ҳудудида яратилган имкониятлар билан таништирилди, шу билан бирга, мазкур ҳудудда жойлашган “Fargin Textile” va “Poti Textile” корхоналари билан истиқболли йўналишлар бўйича музокаралар ўтказилди. Трикотаж мато етказиб бериш, саноат кооперациясини ривожлантириш ҳамда Европа мамлакатларига экспортни йўлга қўйиш мақсадида қўшма корхона ташкил этиш бўйича музокаралар олиб борилди. 

Шу билан бирга, Тбилиси шаҳрида “Poti” EIZ”нинг Инвестиция бўйича директори Тамар Кҳетсадзе билан мазкур ҳудудда солиқ имтиёзлари, экспорт ва импорт учун яратилган имкониятлар, факторинг ва қўшма корхона ташкил этиш салоҳияти бўйича дастлабки музокаралар ўтказилди ва учрашув якунларига кўра хориж томон инвесторлар учун яратилган барча имкониятлар бўйича таҳлилий маълумотлар тақдим этишга келишилди. 

Бундан ташқари, Тбилиси шаҳри туристик салоҳияти юқорилигини инобатга олган ҳолда, ўзбек тўқимачилик компанияси “Imperiya teks” ўз савдо дўкони ва омборхона Тбилиси шаҳрида ташкил этиш истагини билдирди. 

Бунда, мазкур омборхона ва савдо дўконининг харажатлари “Савдони Ривожлантириш компанияси” орқали қопланиши ва мазкур дўконга "Ўзтўқимачиликсаноат" уюшмасига аъзо корхоналар ўз маҳсулотларини жойлаштириш имконияти яратиш юзасидан таклифлар тайёрланмоқда.