Тошкент, Ўзбекистон (UzDaily.uz) — Мажлисда аҳолига ижтимоий хизматлар кўрсатиш тизимини янада такомиллаштиришга қаратилган қонун лойиҳаси иккинчи ўқишда моддама-модда кўриб чиқилди.

Таъкидланганидек, сўнгги йилларда мамлакатимизда фуқароларга пенсияларни тайинлаш тизими босқичма-босқич ислоҳ қилинмоқда. Жумладан, фуқаролардан қўшимча ҳужжатлар талаб этмаган ҳолда биргина шахсни тасдиқловчи ҳужжат асосида пенсия тайинлаш учун Адлия вазирлиги давлат хизматлари марказлари ёки Ўзбекистон Республикаси Ягона интерактив давлат хизматлари портали орқали мурожаат қилиш амалиёти жорий этилди.

Шу билан бирга, фуқароларга пенсия тайинлаш жараёнида инсон омилини камайтириб, давлат хизматларини кўрсатиш сифатини янада ошириш учун соҳада илғор рақамли технологиялардан самарали фойдаланиш зарурати юзага келмоқда.

Ушбу қонун лойиҳаси эса аҳолига пенсия тайинлаш тизимига замонавий ахборот технологияларини фаол татбиқ этган ҳолда, давлат томонидан кўрсатилаётган хизматлар сифатини янада оширишни назарда тутади.

Лойиҳа билан “Фуқароларнинг давлат пенсия таъминоти тўғрисида”ги қонунга пенсия олиш ёшига тўлган (эркаклар 60 ёш, аёллар 55 ёш) фуқароларга ёшга доир пенсияни уларнинг алоҳида мурожаатини талаб этмаган ҳолда проактив шаклда тайинлаш тартибини белгилашга оид  қўшимча ва ўзгартиришлар киритилмоқда.

Мажлисда мазкур қонун лойиҳасини иккинчи ўқишга тайёрлаш давомида масъул қўмита томонидан бир қатор йиғилишлар, семинарлар ўтказилгани, уларда депутатлар берган барча таклифлар чуқур таҳлил қилиниб, улар асосида қонун лойиҳаси пишиқ-пухта ҳолатга келтирилган ҳолда, маромига етказилгани қайд этилди.

Депутатларнинг фикрича, қонун лойиҳасининг қабул қилиниши аҳолига пенсия тайинлаш тизимига замонавий рақамли технологияларни фаол татбиқ этган ҳолда, давлат томонидан кўрсатилаётган хизматлар сифатини янада оширишга хизмат қилади.

Мажлисда қонун лойиҳаси депутатлар томонидан учинчи ўқишда қабул қилинди ваСенатга юборилди.