Тошкент, Ўзбекистон (UzDaily.uz) — Жорий йилининг 26 февраль куни Олий Мажлис Сенати Раисининг биринчи ўринбосари Содиқ Сафоев ва Франциянинг Ўзбекистондаги Фавқулодда ва Мухтор Элчиси Орелия Бушез ўртасида учрашув бўлиб ўтди.

Мулоқот давомида бугунги кунда Ўзбекистон ва Франция ўртасида юқори даражадаги сиёсий вa дипломатик, ўзаро манфаатли ҳамкорлик икки давлат етакчиларининг дўстона муносабатлари туфайли тобора ривож топаётганлиги алоҳида қайд этилди.

Хусусан, савдо-иқтисодий, маданий-гуманитар, таълим соҳаларидаги икки томонлама ҳамкорлик лойиҳалари ижобий натижалар бермоқда.

Халқаро майдонда ҳам икки давлат ҳукуматлари ва парламентлари томонидан илгари сурилган ташаббуслар қўллаб-қувватланаётгани, келгусида ҳам бу борада ҳамжиҳатликни янада ривожлантириш лозимлиги таъкидланди.

Шунингдек, томонлар парламентлараро алоқаларини мустаҳкамлаш мақсадида Франция ҳамда Ўзбекистон парламентларининг дўстлик гуруҳлари ва қўмиталари билан қонун ижодкорлиги борасида тажриба алмашиш ҳамда ҳудудий Кенгашлар ўртасида алоқаларни йўлга қуйиш масалаларини муҳокама қилди.

Ўз навбатида, элчи Франция парламенти вакиллари 2025 йил 5-9 апрель кунлари Марказий Осиё тарихида илк бора Ўзбекистонда ўтказиладиган Парламентлараро иттифоқнинг 150-юбилей ассамблеясида иштирок этишга катта қизиқиш билдираётганини таъкидлаб ўтди.