Fitch TBC Uzbekistan бўйича прогнозни «Барқарор»га ўзгартирди; рейтинг «BB-» даражасида тасдиқланди

Тошкент, Ўзбекистон (UzDaily.uz) — 2025 йил 28 ноябр куни халқаро рейтинг агентлиги Fitch Ratings ўзбек акциядорлик тижорат банки TBC BANK (TBCU) бўйича эмитентнинг узоқ муддатли дефолт рейтинглари (IDR) прогнозини «Негатив»дан «Барқарор»га ўзгартирди.

Шу билан бирга, банкнинг хорижий ва миллий валютадаги узоқ муддатли рейтинглари «BB-» даражасида тасдиқланди, TBCUнинг барқарорлик баҳоси (Viability Rating) эса b даражасида ўзгаришсиз қолди.

Fitchнинг қарори агентлик томонидан Грузияда рўйхатдан ўтган TBC BANK JSC бўйича прогнознинг ҳам «Барқарор»га ўзгартирилиши ва рейтингнинг «BB» даражасида тасдиқланишидан кейин қабул қилинди.

Агентликка кўра, TBCU рейтинги учун асосий омил — TBC томонидан потенциал қўллаб-қувватлаш имконияти бўлиб, у акциядорни қўллаб-қувватлаш рейтинги (SSR)да bb- даражасида акс этган. TBC — TBC BANK Group PLC таркибидаги асосий банк ва TBCUнинг назорат қилувчи акциядори ҳисобланади.

Агентлик қайд этадики, SSR TBC рейтингига нисбатан бир поғона паст белгиланган, чунки ўзбек банкининг гуруҳдаги роли мўътадил ва унинг умумий кўрсаткичларга қўшаётган ҳиссаси нисбатан кичик. Шу билан бирга Fitch TBCUнинг гуруҳга қўшаётган ҳиссаси босқичма-босқич ортиб боради, деб кутмоқда.

Шунингдек, эҳтимолий қўллаб-қувватлашнинг трансчегаравий хусусияти ҳам инобатга олинган, чунки TBC ва TBCU турли юрисдикцияларда фаолият юритади.

Акциядор томонидан қўллаб-қувватлашни баҳолашда агентлик TBCU дефолти юз берган тақдирда TBC учун катта оброий хавф мавжудлигини ҳисобга олган. Бироқ ўзбек банкининг кичик ҳажми туфайли бундай қўллаб-қувватлашнинг эҳтимолий қиймати паст, чунки 2024 йил якунига кўра унинг активлари гуруҳ умумий активларининг атиги 6 фоизини ташкил этган.

Fitch таъкидладики, TBCUнинг узоқ муддатли рейтинглари материн банк рейтингларидаги ўзгаришларга сезгирдир.

TBC рейтингларининг пасайиши ёки гуруҳда TBCUнинг роли камайиши ўзбек банкининг SSR ва узоқ муддатли рейтингининг тушишига олиб келиши мумкин, аммо агентлик бу сценарийни эҳтимолли деб ҳисобламайди.

TBCU рейтингларининг ошиши фақат материн банк рейтинглари ўсиши ёки гуруҳда TBCUнинг роли мустаҳкамланишида мумкин бўлади, бу эса қўллаб-қувватлаш эҳтимолини оширади.

Ҳозирги пайтда бундай шароитлар кузатилмаяпти.