Финляндия ва Ўзбекистон компаниялари икки томонлама бизнесни кенгайтириш масаласини муҳокама қилдилар

Тошкент, Ўзбекистон (UzDaily.uz) — Ўзбекистон Савдо-саноат палатаси ташаббуси билан Финляндия Республикаси Президенти Александр Стуббнинг мамлакатимизга ташрифи доирасида икки давлат тадбиркорлари ўртасида ҳамкорликни кенгайтириш ва тўғридан-тўғри алоқаларни мустаҳкамлаш мақсадида ноформал мулоқот ташкил этилди.

Учрашувда икки томонлама савдо-иқтисодий муносабатларни ривожлантириш, инвестициявий ҳамкорликни кучайтириш ва янги қўшма лойиҳаларни амалга ошириш масалалари муҳокама этилди.

Тадбирда Финляндиянинг 20 дан ортиқ йирик компания ва ташкилотлари, жумладан Wärtsilä, Konecranes, Valmet, Metso, Neste ва Outotec каби етакчи корпорациялар ҳамда “яшил энергетика”, рақамли ечимлар, машинасозлик, сувни тозалаш ва логистика соҳаларида фаолият юритувчи инновацион корхоналар вакиллари қатнашдилар.

Ўзбекистон томонидан Ermak Plus, International Beverages Tashkent, Navruz International, ProCab, New Tone School ва TEAM University билан бир қаторда саноат, агросаноат, логистика ва инновацион технологиялар соҳаларидаги компания ва ташкилотлар иштирок этдилар.

Суҳбат давомида қўшма корхоналар ташкил этиш, технологиялар трансфери, ишлаб чиқаришни маҳаллийлаштириш, шунингдек “яшил иқтисодиёт”, энергетика ва транспорт-логистика соҳаларидаги ҳамкорлик истиқболлари бўйича аниқ таклифлар илгари сурилди.

Учрашув якунида Финляндия бизнесининг Ўзбекистон бозорига катта қизиқиши ҳамда икки томонлама саноат, инновация ва экспорт салоҳиятини янада ривожлантиришга бўлган умумий интилиш қайд этилди.