Фармацевтикани ривожлантириш агентлиги Корея делегацияси билан ҳамкорлик истиқболларини муҳокама қилди

Тошкент, Ўзбекистон (UzDaily.uz) — 2026 йил 7 февраль куни Фармацевтика тармоғини ривожлантириш агентлигида Корея Республикасидан ташриф буюрган делегация билан учрашув бўлиб ўтди.

Учрашувда "Gangwon Technopark" ҳамда "Yonsei University" вакиллари иштирок этди.

Ташриф Инновацион тадбиркорликни қўллаб-қувватлаш маркази U-Enter томонидан ташкил этилди.

Учрашув давомида Агентлик директори Абдулла Азизов томонидан «Tashkent Pharma Park» фармацевтика кластерига бағишланган тақдимот намойиш этилди.

Унда кластернинг фаолият йўналишлари, инфратузилма имкониятлари, инвестициявий муҳит ва хорижий инвесторлар учун яратилган шарт-шароитлар ҳақида маълумот берилди.

Шунингдек, Корея делегацияси вакиллари "Gangwon Technopark" ҳамда "Yonsei University"нинг фармацевтика, тиббий технологиялар, илмий-тадқиқот ва инновацион фаолият йўналишлари бўйича тажрибалари билан ўртоқлашдилар.

Учрашув якунида томонлар фармацевтика ва тиббий технологиялар соҳасида ҳамкорликни янада ривожлантириш ва келгусида амалий ҳамкорлик масалаларини муҳокама қилишга келишиб олдилар.