Фарғона вилояти Хитойлик Fareo компанияси билан лифтлар ишлаб чиқаришни муҳокама қилмоқда

Тошкент, Ўзбекистон (UzDaily.uz) — Фарғона вилояти ҳокими Хайрулло Бозоров Хитойнинг Гуандун провинциясида жойлашган “Fareo Elevator (Guangdong) Co., Ltd.” компанияси вакили Маймайтитурсун Йиминни қабул қилди.

Фошан шаҳрида фаолият юритаётган мазкур компания барча турдаги лифтларни тадқиқ этиш, ишлаб чиқариш, ўрнатиш, техник хизмат кўрсатиш, янгилаш ва модернизация қилиш билан шуғулланади. Корхона маҳсулотлари юқори сифатли, хавфсиз ҳамда кафолатли бўлиб, жаҳоннинг кўплаб мамлакатларига экспорт қилинмоқда.

Учрашувда компания билан ҳамкорликни йўлга қўйиш, Фарғона вилоятида лифт ишлаб чиқариш лойиҳасини амалга ошириш масалалари муҳокама қилинди.

Вилоят ҳокими бошчилигидаги делегациянинг жорий йил апрель ойида Хитойга қилган амалий ташрифида Гуандун провинцияси билан ҳамкорликни мустаҳкамлашга келишилганди. 

Туергонг Туерхун Фарғона вилояти ҳокимининг Хитой Халқ Республикаси Гуандун провинциясидан инвестицияларни жалб қилиш бўйича бизнес вакили этиб тайинланди. Учрашув чоғида унга махсус гувоҳнома топширилиб, келгуси ҳамкорлик истиқболлари келишиб олинди.