Фарғона ва Омск вилоятлари иқтисодиёт ва саноат соҳасидаги ҳамкорликни мустаҳкамламоқда

Тошкент, Ўзбекистон (UzDaily.uz) — Бугун Тошкент шаҳрида Хайрулло Бозоров Россия Федерациясининг Омск вилояти губернатори Виталий Хотсенко билан учрашди. Унда икки томонлама ўзаро манфаатли муносабатларни ривожлантириш масалалари муҳокама қилинди.

Хайрулло Бозоров меҳмонларга ташриф учун миннатдорчилик билдириб, Ўзбекистон ва Россия ўртасидаги стратегик шериклик ва иттифоқчилик муносабатлари янги босқичда изчил ривожланаётганини таъкидлади.

Айниқса, ҳудудлараро алоқалар кун сайин фаоллашиб, ҳозирги кунда Фарғона вилояти Россиялик ҳамкорлар билан тўқимачилик, энергетика ва нефть-кимё, мебель саноати, хизмат кўрсатиш, шунингдек, шаҳарсозлик йўналишларида самарали ҳамкорликни амалга ошириб келаётгани қайд этилди.

Вилоятда россиялик инвесторлар иштирокида 165 дан ортиқ қўшма корхона муваффақиятли фаолият юритаётгани, бу эса йирик лойиҳаларни амалга ошириш ва саноат кооперациясини ривожлантириш учун мустаҳкам платформа эканлиги таъкидланди.

Шу билан бирга, Омск вилояти билан ўзаро манфаатли ҳамкорлик йўлга қўйилгани, қатор йўналишларда қўшма лойиҳалар изчил амалга оширилаётгани билдирилди.

Омск вилояти губернатори Виталий Хотсенко ҳам икки давлат ўртасидаги иқтисодий ва саноат алоқалари жадал ривожланаётганини, айниқса, Фарғона вилояти билан ҳамкорлик бундан буён ҳам янада мустаҳкамланишини таъкидлади.

Россияда Ўзбекистонда етиштирилаётган мева ва қишлоқ хўжалиги маҳсулотларига талаб катталигини, Қувада ташкил этилаётган мевани қайта ишлаш ва логистика маркази бунинг учун яхши имконият бўлаётганлигини билдирди.

Учрашувда ҳамкорлик кўламини янада кенгайтириш ва қўшма дастур ва лойиҳаларни амалга оширишга келишилди.