Фарғонада Хитой капитали иштирокида йирик инвестиция лойиҳалари кўпаймоқда

Тошкент, Ўзбекистон (UzDaily.uz) — Фарғона вилояти ҳокими Хайрулло Бозоров бугун Хитойнинг “Jujiang Construction Group Co.Ltd” компанияси бош директори Лю Юньтао бошчилигидаги инвесторларни қабул қилди. Учрашувда ўзаро манфаатли алоқаларни йўлга қўйиш ҳамда ҳамкорликда истиқболли лойиҳаларни амалга ошириш масалалари муҳокама қилинди.

Вилоят раҳбари Ўзбекистон ва Хитой ўртасидаги муносабатлар янги босқичга чиққанини эътироф этиб, хорижий ишбилармонларнинг Фарғонада бизнес юритишга бўлган қизиқиши кундан кунга ортиб бораётганини таъкидлади. Шунингдек, меҳмонларга ҳудуднинг инвестицион салоҳияти ва иқтисодий имкониятлари ҳақида батафсил маълумот берилди.

“Jujiang Construction Group Co.Ltd” қурилиш соҳасида бой тажрибага эга йирик компания ҳисобланади. Мулоқот давомида компания вакиллари ўз фаолияти тақдимотини ўтказиб, вилоятда қурилиш йўналишида ҳамкорлик қилиш истагини билдиришди. 

Шунингдек, учрашувда инвесторлар ҳудудларнинг мастер режаларини ишлаб чиқиш, қурилиш материаллари ишлаб чиқаришни йўлга қўйиш борасидаги режалари ҳақида сўз юритишди. Бу йўналишда мамлакатимиздаги консалтинг компаниялари билан ҳамкорликда амалга оширилиши режалаштирилаётган лойиҳалар тақдимот қилинди.

Вилоят ҳокими Хайрулло Бозоров бугунги кунда Фарғонада ҳам кенг кўламли бунёдкорлик ишлари олиб борилаётгани, янги массивлар ва замонавий шаҳарчалар барпо этилаётганини қайд этди. Бу жараёнда илғор хорижий тажрибани қўллаш муҳимлиги айтиб ўтилди. Якунда инвесторларнинг таклифлари қўллаб-қувватланиб, лойиҳаларни амалга оширишни жадаллаштиришга келишиб олинди.