Тошкент, Ўзбекистон (UzDaily.uz) — Фарғона нефтьни қайта ишлаш заводида ишлаб чиқариш ва логистика жараёнларини самарадор ва шаффоф тарзда ташкил этишга қаратилган кенг кўламли трансформация дастури амалга оширилмоқда.

Ушбу жараённинг муҳим босқичларидан бири — замонавий юклаш терминали ва SAP рақамли платформасини жорий этиш бўлди. Ушбу тизим ёрдамида нефт маҳсулотларини юклашнинг барча босқичлари — аризани рўйхатдан ўтказишдан тортиб, транспорт воситаларининг корхона ҳудудидан чиқишигача — автоматлаштирилган ҳолда назорат қилинади.

Тизимни бошқариш SEG компаниясининг таркибий тузилмаси — TASCO томонидан амалга оширилмоқда. Жараёнларни тўлиқ рақамлаштириш орқали қўлдаги аралашув эҳтиёжи бартараф этилди, бу эса операциялар шаффофлигини оширди, хато ва камчиликлар хавфини камайтирди ҳамда шериклар учун хизмат сифатини янада яхшилади.

SEG TASCO тижорат департаменти бошлиғи Фахриддин Турабжанов таъкидлаганидек:

«Бизнинг мақсад — маҳсулот ҳаракатидаги ҳар бир босқичда тўлиқ шаффофлик ва холисликни таъминлаш. Бу — ҳамкорларимиз ва жамият ишончи учун муҳим асосдир».