EХҲТ янги авлод журналистларини тайёрлашга кўмаклашмоқда

Тошкент, Ўзбекистон (UzDaily.uz) —  Тошкентдаги Халқаро Нордик университетининг анжуманлар залида иш қизғин давом этмоқда: ёш журналистлар ва талабалар соҳа мутахассисларидан  замонавий медиа маконда қандай ишлаш ва сифатли маҳсулот - қизиқарли, холис, энг муҳими, ишончли янгиликлар, ҳикоялар, видеорепортажлар ва бошқа медиа материалларни яратишни ўрганмоқда.

“Замонавий медиа: ҳуқуқ, хавфсизлик ва рақамли воситалар” мавзусидаги беш кунлик курс 2-5 декабрь кунлари EХҲТнинг Ўзбекистондаги лойиҳалар координатори, Миллий масс-медиани қўллаб-қувватлаш ва ривожлантириш жамоат фонди, Халқаро Нордик университети ва Замонавий журналистикани ривожлантириш маркази томонидан ташкил этилди.

Дастур шундай тузилганки, ҳар куни иштирокчиларга янги уфқларни очади. Иштирокчилар оммавий ахборот воситалари тўғрисидаги қонунчилик асосларини ҳамда давлат органларидан маълумот олишни ўрганадилар. Ахлоқ ва ахборот хавфсизлигига алоҳида эътибор қаратилади. Бу масалалар шунчаки назарий эмас, балки ҳаётий мисоллар ва амалий мунозаралар орқали кўриб чиқилади. Кейинги қадам – фактларни текшириш, чунки дезинформацияни аниқлаш ва олинган маълумотларнинг тўғрилигини текшириш қобилияти замонавий журналистнинг асосий кўникмаларидан бирига айланмоқда.  

Ҳаётимизда мустаҳкам ўрин эгаллаган рақамли технологиялар ва сунъий интеллектга алоҳида эътибор қаратилмоқда. Сунъий интеллект воситалари ғоялар яратиш ва материаллар тайёрлашда ёрдам беради, бироқ улардан фойдаланишнинг ахлоқий жиҳатлари ҳамда автоматлаштириш даврида маълумотларнинг аниқлиги ва ишончлилигини сақлаб қолиш масаласи ҳам муҳокама қилинмоқда

Мутахассислар раҳбарлигида ёш журналистлар смартфондан сифатли видео суратга олишни, ижтимоий тармоқлар учун контент яратишни ва аудитория метрикаларини таҳлил қилишни ўрганадилар.

Беш кунлик курс нафақат касбий кўникмаларни ривожлантириш, балки ёш журналистларда танқидий фикрлаш ва масъулиятни шакллантиришга қаратилган. Ўқув курси "Гендер асосидаги зўравонликка қарши 16 кунлик фаоллик" кампанияси доирасида ўтказилмоқда - бу йил кампания рақамли зўравонлик масалаларига эътибор қаратади. Бу профессионал журналистика, медиасаводхонлик, онлайн хавфсизлик ва масъулиятли контент яратиш масалаларининг муҳимлигини таъкидлайди.