Тошкент, Ўзбекистон (UzDaily.uz) — Европа Иттифоқи Кенгаши Эдуардс Стипрайсни Марказий Осиё бўйича махсус вакил (ЭУСР) этиб тайинлади.

У 2025 йил 1 мартдан ўз вазифаларини бажаришга киришади.
Унинг дастлабки мандати икки йил давом этади.

Баёнотда таъкидланишича, янги ЕИ махсус вакили асосий вазифаси – Европа Иттифоқи ва Марказий Осиё давлатлари ўртасида умумий қадриятларга асосланган алоқаларни мустаҳкамлашдан иборат.

Унинг вазифалари қаторида минтақа барқарорлигига кўмаклашиш, давлатлар ўртасида ҳамкорликни ривожлантириш, шунингдек, демократия, қонун устуворлиги, самарали бошқарув ва инсон ҳуқуқларини ҳимоя қилишни қўллаб-қувватлаш мавжуд.

Бундан ташқари, Стипрайс Европа Иттифоқининг Марказий Осиёдаги роли ва таъсирини ошириш устида иш олиб боради, хусусан, ЕХҲТ ва БМТ каби халқаро ташкилотлар билан ҳамкорликни кучайтириш орқали.

Эдуардс Стипрайс тажрибали латвиялик дипломат ҳисобланади. У Латвиянинг Европа Иттифоқидаги доимий вакили лавозимида ишлаган, Латвия Ташқи ишлар вазирлигида давлат котиби ўринбосари – сиёсий директор сифатида фаолият юритган. 2016-2020 йилларда у Европа Иттифоқининг Ўзбекистондаги ваколатхонасига раҳбарлик қилган, шунингдек, аввалроқ Латвиянинг Буюк Британия ва Франциядаги элчиси бўлган.

Стипрайс 2021 йил июлидан буён лавозимда бўлган Терхи Хакалунинг ўрнини эгаллайди.