Тошкент, Ўзбекистон (UzDaily.uz) — Эрон Ислом Республикаси Ташқи ишлар вазирлиги матбуот котиби Исмоил Бакайи “Tehran Times” газетасида чоп этилган муаллифлик мақоласида Исроилнинг яқинда Эрон ҳудудига қилган ҳужумини “барча халқаро ҳуқуқ нормаларини бузувчи очиқ тажовуз” деб атади.

Дипломатнинг таъкидлашича, 2025 йил 23 июнь куни Исроил ҳеч қандай огоҳлантиришсиз кенг кўламли ҳарбий амалиёт бошлаб, яшаш массивлари, инфратузилма ва ХАМА (МАГАТЭ) назорати остидаги ядровий объектларга зарбалар берди.

«Аҳоли турар жойига қилинган ракетали ҳужум оқибатида 60 нафар тинч фуқаро, жумладан, 35 нафар аёл ва бола ҳалок бўлди. Бу — ёвуз жиноят ва БМТ Устави ҳамда халқаро гуманитар ҳуқуқнинг очиқдан-очиқ бузилиши», — дея таъкидлади Бакайи.

У Исроил ҳаракатлари нафақат минтақавий, балки глобал хавфсизлик тизими учун ҳам таҳдид солишини билдирди.

Эрон ТИВнинг фикрича, Исроил томонидан ҳужум учун баҳона сифатида Эроннинг ядровий дастурини кўрсатиш асоссиз ва сунъий сабабдир. Чунки ушбу объектлар тўлиқ халқаро назорат остида бўлиб, фақат тинч мақсадларда фойдаланилади. Бакайи Халқаро атом энергияси агентлиги раҳбари Рафаэль Гросси БМТ Хавфсизлик Кенгашининг фавқулодда мажлисида буни тасдиқлаганини эслатди. У амалга оширилаётган резолюциялар ядровий инфратузилманинг дахлсизлигини кафолатлашини таъкидлаган.

Дипломатнинг таъкидлашича, Эроннинг жавоб чоралари “қонуний, мутаносиб ва фақат ҳарбий объектларга йўналтирилган бўлиб, БМТ Уставининг 51-моддасига тўлиқ мувофиқдир, у ўзини ҳимоя қилиш ҳуқуқини назарда тутади”.

«Жавоб ҳаракатларимиз фақат ҳарбий аҳамиятга эга объектларга қаратилган. Биз халқаро гуманитар ҳуқуқ тамойилларига қатъий риоя қилдик ва тинч аҳоли орасидаги йўқотишларни минималлаштиришга интилдик», — деди Бакайи.

Эрон ТИВ матбуот котиби БМТ Хавфсизлик Кенгашининг сукут сақлаётганини кескин танқид қилди ва буни “жамоавий хавфсизлик тизимининг инқирози” деб атади. У 1981 йилда ХК Исроилнинг Ироқдаги “Осирак” реакторига қилган ҳужумига зудлик билан баёнот билан жавоб қайтарганини, аммо ҳозирги агрессия халқаро муносабатсиз қолганини эслатди.

Мақоласи якунида Бакайи жаҳон ҳамжамиятини бирдамликка чақирди:
«Биз барча давлатларни ушбу тажовузни қоралашга ва БМТ Уставига содиқлигини тасдиқлашга чақиримиз. Суверенитет торг қилинмайди. Тинчлик — масъулият билан бошланади. Халқаро ҳамжамият ўзининг масъулиятга тайёрлигини кўрсатиши лозим».

Эрон томони халқаро ташкилотлар қонуний ҳуқуқни зўравон куч билан алмаштиришга йўл қўймаслиги шартлигини таъкидламоқда. Исроил эса халқаро нормаларни тизимли равишда бузгани учун жавобгарликка тортилиши керак, деб ҳисоблайди.