Эрон ЖЧ ўйинларини Мексикага кўчириш бўйича музокара қилмоқда

Тошкент, Ўзбекистон (UzDaily.uz) — Эрон футбол федерацияси президенти Меҳди Тож мамлакат жаҳон чемпионати доирасидаги ўз ўйинларини АҚШ ўрнига Мексикада ўтказиш масаласида ФИФА билан музокаралар олиб бораётганини маълум қилди. Қарор АҚШ ва Исроил томонидан амалга оширилган авиаҳужумлардан сўнг футболчилар хавфсизлигига таҳдид пайдо бўлгани билан боғлиқ. Бу ҳақда Reuters хабар бермоқда.

«Трамп очиқчасига Эрон миллий жамоаси хавфсизлигини кафолатлай олмаслигини айтган экан, биз, албатта, Америкага бормаймиз», — деб ёзди Тож Эроннинг Мексикадаги элчихонаси X платформасидаги аккаунтида. Ҳозирча ФИФА томонидан расмий изоҳ берилмаган.

Эрон жамоаси Осиё саралашининг учинчи босқичида ўз гуруҳида биринчи ўринни эгаллаб, қатор тўртинчи бор жаҳон чемпионатига йўлланма олди. Турнир 11 июнь куни бошланиб, АҚШ, Канада ва Мексикада ўтказилади. Эрон жамоаси гуруҳ босқичида икки ўйинни Лос-Анжелесда, яна бирини Сиэтлда ўтказишни режалаштирган эди. G гуруҳида жамоанинг рақиблари Бельгия, Миср ва Янги Зеландия бўлади.

Ўйинларни Мексикага кўчириш жиддий логистик муаммоларни келтириб чиқаради, аммо халқаро амалиётда хавфсизлик ёки геосиёсий сабабларга кўра ўйин ўтказиш жойи ўзгартирилган ҳолатлар учраб туради. Масалан, 2025 йил сентябрь ойида Шотландия терма жамоаси Беларусга қарши саралаш ўйинини Украинадаги вазият билан боғлиқ хавфсизлик таҳдидлари сабаб Венгриянинг Залаэгерсег шаҳрида ўтказган. Шунингдек, ўтган йили Ҳиндистон сиёсий сабабларга кўра Чемпионлар кубоги доирасидаги барча ўйинларини Покистондан ташқарида ўтказган.

Агар ФИФА ўйинларни кўчиришни маъқулламаса, Эроннинг АҚШда ўтадиган турнирда иштирок этиши имконсиз бўлиб қолиши мумкин. Ўтган ҳафта Эрон спорт вазири АҚШ ва Исроил томонидан Теҳронга қилинган авиаҳужумлардан сўнг футболчилар иштирок этиши хавф остида қолганини билдирган, ушбу ҳужумлар натижасида Ислом Республикасининг олий раҳбари ҳалок бўлган.

Осиё футбол конфедерацияси (AFC) маълум қилишича, ҳозирча Эроннинг турнирдан чиқиши бўйича расмий хабар келиб тушмаган. «Якуний қарор федерация томонидан қабул қилинади ва ҳозирча у жаҳон чемпионатида иштирок этишни режалаштирмоқда», — деди AFC бош котиби Уиндзор Жон Куала-Лумпурда бўлиб ўтган матбуот анжуманида.