Элдор Шомуродов мавсумдаги учинчи голини урди, аммо «Истанбул Башакшехир» «Коньяспор»га мағлуб бўлди

Тошкент, Ўзбекистон (UzDaily.uz) — Ўзбекистон терма жамоаси ҳужумчиси Элдор Шомуродов Туркия Суперлигасида голлари билан мухлисларни ҳайратда қолдиришда давом этмоқда.

«Коньяспор» ва «Истанбул Башакшехир» ўртасидаги баҳсда ўзбек жамоаси сардори мавсумдаги учинчи голини урди. Шомуродов рақибнинг марказий майдонида тўпни қабул қилиб, ҳимоя чизиғини йириб ўтди ва дарвозабонни ортда қолдириб, аниқ зарба йўллади.

Бироқ бу гол «Истанбул Башакшехир»ни мағлубиятдан асраб қолмади — учрашув 1:2 ҳисоби билан «Коньяспор» фойдасига якунланди.

Иккинчи бўлимда жамоа мураббийлари майдон марказини мустаҳкамлаш мақсадида 64-дақиқада Ўзбекистон терма жамоаси яримҳимоячиси Аббосбек Файзуллаевни майдонга туширишди.

Олти турдан кейин «Истанбул Башакшехир» олти очко тўплаб, Туркия Суперлигаси жадвалида 12-ўринни эгаллаб турибди.