Тошкент, Ўзбекистон (UzDaily.uz) — Европа Иттифоқи Россияга қарши 16-йирик санкциялар пакети доирасида Ўзбекистон компанияларини санкциялар рўйхатига киритди.

Европа Иттифоқи Кенгаши Россия, Хитой, Қозоғистон, Ҳиндистон, Сингапур, Туркия, БАА ва Ўзбекистондан 53 ташкилотни санкциялардан қочишда гумон қилинган субъектлар рўйхатига киритди. Баёнотда Ўзбекистондан нечта компания рўйхатга киритилгани ва уларнинг номлари очиқланмаган.

Санкциялар икки мақсадли товарлар ва технологиялар ҳамда Россия мудофаа сектори ривожига ҳисса қўшиши мумкин бўлган маҳсулотлар учун экспорт чекловларини кучайтиришни кўзда тутади.

Европа Иттифоқи маълумотларига кўра, санкциялар рўйхатига киритилган компаниялар савдо чекловларини четлаб ўтиш ёки Россия ҳарбий амалиётларида ишлатилаётган дрон ва ракета компонентларини етказиб беришга алоқадорликда гумон қилинмоқда.