Тошкент, Ўзбекистон (UzDaily.uz) — Ўзбекистон Республикаси Ички ишлар вазирлиги машҳур диний блогер ва Azon Global портали асосчиси Алишер Турсуновни (Мубашшир Аҳмад тахаллуси билан танилган) қидирувга берди.

ИИВ матбуот котиби Шоҳруҳ Ғиёсов маълум қилишича, Турсуновга нисбатан Жиноят кодексининг 244-2-моддаси 1-қисми бўйича жиноий иш қўзғатилган. Ушбу модда диний экстремистик, сепаратистик, фундаменталистик ёки бошқа таъқиқланган ташкилотларни тузиш, уларга раҳбарлик қилиш ёки иштирок этиш учун жавобгарликни назарда тутади. Унга кўра, 5 йилдан 15 йилгача озодликдан маҳрум қилиш жазоси тайинланиши мумкин.

Эслатиб ўтамиз, 2023 йил август ойида Мубашшир Аҳмад 2017 йилда ташкил этилган Azon New Media гуруҳининг барча лойиҳаларини ёпиш ҳақида эълон қилган эди. Ушбу гуруҳга Azon.uz сайти, Azon FM онлайн радиоси ва Azon TV онлайн телевидениеси кирган.

2023 йил ноябрь ойида эса тўрт тилда — ўзбек, рус, инглиз ва турк тилларида фаолият юритувчи Azon Global портали ишга туширилди.

2023 йил 28 декабр куни Туркия ҳуқуқ-тартибот органлари Мубашшир Аҳмадни қўлга олишди. Ўзбекистоннинг Истанбулдаги Бош консулхонаси маълум қилишича, уни полиция уйидан олиб кетиб, депортация марказига жойлаштирган.

Консулликнинг расмий баёнотида қайд этилишича, ушбу жараёнда Турсуновга консуллик ва ҳуқуқий ёрдам кўрсатилган. 2024 йил 21 февралда у депортация марказидан озод қилинган.