Дилшод Пулатов «Пойтахт банк» бошқаруви раиси этиб тайинланди

Тошкент, Ўзбекистон (UzDaily.uz) — «Пойтахт банк»да янги раҳбар тайинланди. Ягона корпоратив ахборот портали маълумотига кўра, 8 сентябрда Bond Investment Limitedнинг ягона акциядор қарори билан банк бошқаруви раиси лавозимига Дилшод Пулатов тайинланди. Унинг номзоди Марказий банк билан келишилиши лозим, шундан сўнг уч йиллик меҳнат шартномаси имзоланади.

Август ойи охирида Дўстбой Абжаловни алмаштирган ва банк раҳбари вазифасини вақтинча бажариб келаётган Аброр Тургунов вақтинча бошқарув раиси ўринбосари вазифасини бажарувчи этиб тайинланди.

Дилшод Пулатов 2013 йилдан буён Octobank бошқаруви раиси биринчи ўринбосари лавозимида ишлаб келган. У Тошкент молия институтини «Молия ва кредит» ҳамда «Банк иши» йўналишлари бўйича тамомлаган. Пулатовнинг банк тизимидаги умумий меҳнат стажи 25 йилни ташкил қилади.

«Пойтахт банк» 2019 йил бошида ипотека кредитларини бериш ва қурилиш лойиҳаларини, жумладан, арзон уй-жой дастурларини молиялаштириш мақсадида ташкил этилган. Ташкил этилган пайтдан бошлаб устав капитали 100% давлатга Тошкент шаҳар ҳокимияти орқали тегишли бўлган.

2021 йил май ойида Давлат активларини бошқариш агентлиги (ДАБА) банкни хусусийлаштириш бўйича аризалар қабул қилишни биринчи марта эълон қилди. Шу йил ёз ойида «Пойтахт банк»ни сотиб олиш нияти борлигини учта даъвогар билдирган, аммо кейинчалик улар ҳақида қўшимча маълумот берилмаган.

2024 йил июн ойида ДАБА БААнинг Bond Investments Limited компанияси билан хусусийлаштириш бўйича келишувга эришди. Компания давлатнинг 100% улушини 10 миллион АҚШ долларига сотиб олди.

Консультант маълумотларига кўра, харидор ЕИ, АҚШ ва йирик халқаро молия институтларининг очиқ санкциялар рўйхатларига киритилмаган.