Тошкент, Ўзбекистон (UzDaily.uz) — Мажлисда “Ўзбекистон Республикаси билан Озарбайжон Республикаси ўртасида иттифоқчилик муносабатлари тўғрисидаги Шартномани (Тошкент, 2024 йил 23 август) ратификация қилиш тўғрисида”ги қонун лойиҳаси кўриб чиқилди.

Ушбу Шартнома икки давлат раҳбарлари томонидан 2024 йил 23 август куни Тошкент шаҳрида бўлиб ўтган Ўзбекистон Республикаси ва Озарбайжон Республикаси Олий Давлатлараро кенгашининг биринчи мажлиси якунлари бўйича имзоланган.

Охирги йилларда Ўзбекистон томонидан олиб борилаётган прагматик ва очиқ ташқи сиёсат натижасида Ўзбекистоннинг қўшни давлатлар билан яхши қўшничилик муносабатлари ўрнатилди. Бу борада сўнгги йилларда Ўзбекистон ва Озарбайжон ўртасидаги сиёсий, иқтисодий, маданий-гуманитар соҳадаги ҳамкорлик ривожланиб, 2024 йил 23 август куни иккита давлат раҳбарлари учрашуви натижасида Ўзбекистон Республикаси билан Озарбайжон Республикаси ўртасида иттифоқчилик муносабатлари тўғрисидаги Шартнома имзоланди. Бу билан Ўзбекистон — Озарбайжон муносабатларини давлатлараро ҳамкорликнинг энг юқори даражасига кўтаришга эришилди.

Шартнома муқаддима ва 24 моддадан иборат бўлиб, унинг асосий қоидалари икки давлатнинг бир-бирига қарши босқинчилик ҳаракатларига йўл қўймаслик, блок ёки иттифоқларда иштирок этмаслик, учинчи давлатларнинг қуролли ҳужум вазиятларини тинч йўл билан ҳал қилиш, халқаро терроризм, экстремизм ва уюшган жиноятчиликка қарши курашда ҳамкорликни янада ривожлантиришга қаратилган.

Шу билан бирга, ҳужжат ташқи сиёсат, парламент дипломатияси, мудофаа ва хавфсизлик, иқтисодий ҳамкорлик ва инвестицион фаолиятни ривожлантириш, “яшил” ва рақамли иқтисодиёт, электрон тижорат, энергетика, АКТ, IT-хавфсизлик ва СИ, транспорт тизимини, маънавий-маърифий, маданий, ижтимоий ҳамда туризм соҳаларида, халқаро ва минтақавий ташкилотлар, форумлар доирасидаги ҳамкорликни янада ривожлантиришни ўз ичига олган.

Мазкур Шартнома икки мамлакат мустақиллиги, суверенитети, ҳудудий яхлитлиги ва барқарор иқтисодий ривожланишини янада мустаҳкамлашга қаратилган давлатлараро муносабатларнинг янги босқичини ҳуқуқий жиҳатдан мустаҳкамлашга хизмат қилади.

Мажлисда қонун лойиҳаси депутатлар томонидан учинчи ўқишда қабул қилинди ва Сенатга юборилди.