Депортация қилинган 44 нафар Ўзбекистон фуқароси АҚШдан Ўзбекистонга олиб келинди

Тошкент, Ўзбекистон (UzDaily.uz) — Америка Қўшма Штатларидан қонуний асосларсиз АҚШ ҳудудида бўлгани сабабли депортация қилинган 44 нафар Ўзбекистон фуқароси иштирокидаги чартер рейс Ўзбекистонга етиб келди. Бу ҳақда Ўзбекистон Ташқи ишлар вазирлиги матбуот хизмати хабар қилди.

21 январь куни амалга оширилган мазкур рейс АҚШнинг тегишли давлат органлари билан яқин ҳамкорликда ташкил этилди, бу эса фуқароларимизнинг Ватанга хавфсиз ва ўз вақтида қайтиб келишини таъминлаш имконини берди.

Вазирликда ушбу операция Ўзбекистон билан Америка Қўшма Штатлари ўртасидаги самарали ҳамкорликнинг яна бир тасдиғи экани таъкидланди.

Шунингдек, ТИВ чет элда бўлган Ўзбекистон фуқароларининг қонуний ҳуқуқларини ҳимоя қилиш ва уларни Ватанга қайтариш бўйича ишлар устувор йўналиш бўлиб қолишини ҳамда бу борадаги фаолият изчил давом эттирилишини қайд этди.