Деновда йўл-транспорт ҳодисасидан кейин шифокор ва жабрланувчига ҳужум қилган "Alfa" гуруҳининг олти аъзоси ҳибсга олинди

Тошкент, Ўзбекистон (UzDaily.uz) — Давлат хавфсизлик хизмати ҳамда Сурхондарё вилояти Ички ишлар бошқармаси ходимлари томонидан Денов туманида яшовчи жиноий гуруҳнинг олти нафар аъзосининг фаолиятига чек қўйилди.

Ички ишлар вазирлиги маълумотларига кўра, ушланган шахслар ўзларини «Alfa» деб атаб, Telegram ижтимоий тармоғида шу номдаги гуруҳни ташкил этган. Гуруҳ аъзолари турли спорт турлари билан шуғулланиб, кўча жанжалларида иштирок этган. Гуруҳ етакчиси 28 ёшли Холмуродов Суннатуллох Музаффарович ҳисобланади.

Гуруҳ аъзолари орасида Каримов Элбек Муродулла ўғли (1998 йилда туғилган), Ибодов Аслиддин Карим ўғли (1998 йилда туғилган), Давлатов Азамат Алишер ўғли (1998 йилда туғилган), Жўраев Жавоҳир Бурон ўғли (1998 йилда туғилган) ва Жумаев Баҳриддин Норматович (1989 йилда туғилган) бор.

Жорий йилнинг 6 январь куни тахминан соат 20:50 ларда уларнинг барчаси Skoda ва Kia автомашиналари иштирокидаги йўл-транспорт ҳодисасидан сўнг Денов тумани тез тиббий ёрдам бўлимига боришган.

Ташрифдан мақсад Skoda автомашинаси ҳайдовчиси бўлган танишларини кўриш, шу билан бирга Kia автомашинаси ҳайдовчисига жисмоний босим ўтказиш бўлган.

Шифохонада гуруҳ аъзолари маъмуриятнинг тартибга риоя қилиш ҳақидаги талабларини инкор этиб, жанжал қўзғатган ва фаол қаршилик кўрсатган. Ҳужум натижасида шифокор ҳамда йўл-транспорт ҳодисасида жабрланган шахс тан жароҳати олган.

Мазкур ҳолат юзасидан Ўзбекистон Республикаси Жиноят кодексининг 277-моддаси 3-қисми «г» бандига мувофиқ жиноят иши қўзғатилди. Мазкур моддада ҳокимият вакилига ёки безорилик ҳаракатларини тўхтатишга уринган фуқароларга қаршилик кўрсатиш билан боғлиқ безорилик учун жавобгарлик белгиланган.

Ҳозирда тергов ҳаракатлари олиб борилмоқда, гумонланувчилар қўлга олинган, эҳтиёт чораси сифатида қамоққа олиш белгиланган.

Гуруҳ ҳаракатларидан жабр кўрган фуқаролар ички ишлар органларига мурожаат қилишлари ёки 102 қисқа рақамига қўнғироқ қилишлари мумкин.