Тошкент, Ўзбекистон (UzDaily.uz) — Delta Global Dynamics қурилиш компанияси «Трест-12»нинг 51,12% давлат улушини сотиб олиш бўйича тендер ғолиби бўлди.

Давлат активларини бошқариш агентлиги маълумотига кўра, танловнинг дастлабки босқичида тўртта даъвогар қизиқиш билдирган, улардан учтаси кейинги босқичга ўтказилган.

Белгиланган муддатда иккита мажбурий таклиф келиб тушган ва уларни кўриб чиқиш натижасида Delta Global Dynamics’нинг таклифи энг яхшиси деб топилган.

Компания давлат улуши учун 111 миллиард сўм таклиф этган. Бу сумма консультант томонидан ҳисобланган индикатив диапазоннинг юқори чегарасига яқин ва активнинг баҳоланган қийматига мос келади.

Шартнома шартига кўра, харидор икки йил давомида мавжуд иш ўринларини сақлаб қолиш, иш ҳақи фондини барқарор ушлаб туриш ва жамоавий шартнома шартларини ёмонлаштирмаслик мажбуриятини олган.

Бу битим Давлат хусусийлаштириш комиссияси томонидан маъқулланган.

«Трест-12» АЖ — Ўзбекистондаги йирик қурилиш-монтаж ташкилотларидан бири бўлиб, юридик ва жисмоний шахсларга тўлиқ қурилиш хизматларини тақдим этади.

Компания амалга оширган лойиҳалар орасида:

Ўзбекистон Республикаси Вазирлар Маҳкамаси биноси

Миллий кутубхона

Hyatt Regency меҳмонхонаси

GM Powertrain заводи ва бошқа муҳим иншоотлар бор.