Лазиз Қудратов: Ўзбекистон-Ироқ иқтисодий ҳамкорлиги катта салоҳиятга эга

Тошкент, Ўзбекистон (UzDaily.uz) — 2026 йил 14 январь куни Ўзбекистон Республикаси Инвестициялар, саноат ва савдо вазири Лазиз Кудратов Тошкент шаҳрида бўлиб ўтган Ўзбекистон-Ироқ инвестиция ва бизнес-форумида иштирок этди. Форум ушбу форматдаги илк йирик майдон бўлиб, икки мамлакат ишбилармон доираларини бирлаштирди.

Форумда Ўзбекистон ва Ироқдан 300 нафардан ортиқ тадбиркорлар ҳамда соҳавий ташкилотлар вакиллари, шунингдек Ироқ томонидан юқори мартабали расмий меҳмонлар, жумладан Ироқ Республикаси савдо вазири Атир Довуд ал-Ғурайрий, Миллий инвестиция комиссияси ҳамда Ироқ иқтисодий кенгаши раҳбарияти иштирок этди. Ўзбекистон томонидан тадбирда Савдо-саноат палатаси раиси Даврон Ваҳабов қатнашди.

Мазкур форум ўзбек–ироқ ишбилармонлик ҳамкорлиги тарихидаги иккинчи бизнес-форум бўлди. Илк шундай тадбир 2025 йил декабрь ойида Бағдод шаҳрида ўтказилган бўлиб, унда Ўзбекистон Республикаси Инвестициялар, саноат ва савдо вазирлиги номидан вазир ўринбосари Шоҳрух Ғуломов иштирок этган. Форумларнинг изчил ташкил этилиши икки мамлакат ишбилармон доиралари ўртасидаги мулоқотнинг тизимли характерга эга эканини, шунингдек алоқаларни ўрнатишдан амалий савдо-иқтисодий ва инвестициявий лойиҳаларни амалга ошириш босқичига ўтилаётганини тасдиқлайди.

Форумда сўзга чиққан Лазиз Қудратов ўзбек–ироқ савдо-иқтисодий ҳамкорлигининг салмоқли салоҳиятини ҳамда бизнес доираларнинг тўғридан-тўғри алоқаларни кенгайтиришга бўлган юқори қизиқишини таъкидлади. Истиқболли йўналишлар қаторида фармацевтика, қурилиш материаллари ишлаб чиқариш, қишлоқ хўжалиги ва маҳсулотларни қайта ишлаш, электротехника ва автомобилсозлик саноати, озиқ-овқат ҳамда мебель тармоқлари, шунингдек саноат кооперациясини ривожлантириш ва қўшма ишлаб чиқаришларни ташкил этиш қайд этилди.

Муҳокамалар давомида ўзаро савдони кенгайтириш ва товар айирбошлаш таркибини диверсификация қилиш масалаларига алоҳида эътибор қаратилди. Томонлар фармацевтика маҳсулотлари ва тиббий буюмлар, қурилиш материаллари, электротехника ва кабель маҳсулотлари, маиший техника, қишлоқ хўжалиги ҳамда озиқ-овқат маҳсулотлари, жумладан мева-сабзавот ва уларни қайта ишлаш маҳсулотлари, шунингдек тўқимачилик, енгил саноатнинг тайёр маҳсулотлари, мебель, автокомпонентлар ва ҳар икки мамлакат бозорида талаб юқори бўлган саноат ускуналарини етказиб бериш бўйича катта имкониятлар мавжудлигини таъкидладилар.

Форум доирасида ўзаро англашув меморандумлари ва тижорат келишувларини имзолаш маросими бўлиб ўтди. Шундан сўнг ташкил этилган B2B-учрашувлар тадбиркорларга аниқ лойиҳалар, экспорт-импорт етказиб беришлари ҳамда узоқ муддатли ҳамкорлик шаклларини муҳокама қилиш имконини берди.

Ўзбекистон-Ироқ бизнес-форуми томонларнинг ҳамкорликни амалий мазмун билан бойитишга бўлган ўзаро манфаатдорлигини яна бир бор тасдиқлади ҳамда Ўзбекистон ва Ироқ ўртасида барқарор савдо-иқтисодий алоқалар, инвестициявий ҳамкорлик ва саноат кооперациясини ривожлантириш йўлидаги муҳим қадам бўлди.