Тошкент, Ўзбекистон (UzDaily.uz) — Фарғона вилоятининг Фурқат туманида Damas автомобили ва юк машинаси иштирокида йўл-транспорт ҳодисаси рўй берди.

Ички ишлар вазирлиги ЙҲХББ матбуот хизмати хабарига кўра, Damas ҳайдовчиси хавфсиз масофани сақламагани оқибатида юк машинаси билан тўқнашув содир бўлган.

Ҳодиса натижасида Damas автомобили жиддий шикастланган. Ҳайдовчи ва йўловчиларни махсус техник воситалар ёрдамида чиқаришга тўғри келган. Ҳодиса оқибатида икки киши вафот этган, яна бир киши шифохонага ётқизилиб, реанимация бўлимига жойлаштирилган.

Мазкур ҳолат юзасидан Ўзбекистон Республикаси Жиноят кодексининг 266-моддаси (транспорт воситаларини бошқариш ёки фойдаланиш қоидаларини бузиш инсон ўлимига олиб келган ҳоллар) бўйича жиноят иши қўзғатилган. Тергов ҳаракатлари олиб борилмоқда.