“Dal Engineering Group” компанияси «Ангрен» эркин иқтисодий зонасида сендвич-панель ишлаб чиқаришни йўлга қўйишни режалаштирмоқда

Тошкент, Ўзбекистон (UzDaily.uz) — Жорий йилнинг 14 октябрь куни Инвестициялар, саноат ва савдо вазирлигида Туркиянинг Dal Engineering Group компанияси бошқарув кенгаши раиси Жевдет Дал бошчилигидаги делегация билан учрашув бўлиб ўтди.

Dal Engineering Group компанияси 1985 йилда ташкил этилган бўлиб, бош офиси Истанбул шаҳрида жойлашган. Компания активлари қарийб 1 миллиард АҚШ долларига тенг, ходимлар сони эса 500 нафарни ташкил этади.

Ўзбекистонда компания икки йирик лойиҳани амалга оширмоқда: йилига 70 минг тонна қувватга эга, қиймати 10 миллион доллар бўлган 500 ва 600 маркали оқ тсемент ишлаб чиқариш лойиҳаси (110 иш ўрни яратилган), шунингдек, йилига 12 минг тонна металл конструкциялар ишлаб чиқариш лойиҳаси (қиймати 15,8 миллион доллар, 370 нафар ходим ишлайди).

Учрашув давомида импорт ўрнини босувчи маҳсулот ишлаб чиқарувчиларни қўллаб-қувватлаш, хорижий инвесторлар учун қўшимча қулайликлар яратиш ва компания фаолиятидаги долзарб масалаларни ҳал этиш масалалари муҳокама қилинди.

Айниқса, «Ангрен» эркин иқтисодий зонасида амалга оширилаётган лойиҳанинг иккинчи босқичи - сендвич-панеллар ишлаб чиқаришни ташкил этиш масаласига алоҳида эътибор қаратилди. Томонлар ҳамкорликни янада кенгайтириш ва янги инвестиция ташаббусларини илгари суриш бўйича ҳамкорликни фаоллаштиришга келишиб олдилар.