Тошкент, Ўзбекистон (UzDaily.uz) — Давлат активларини бошқариш агентлиги (ДАБ) «Автоойна» компаниясининг 100% акцияларини сотиб олиш бўйича аризалар қабул қилиш муддатининг узайтирилганини эълон қилди.

Сентябрь ойида тўртта даъвогар аризалар топширган бўлиб, улар мажбурий таклифларни тақдим этиш учун қабул қилинган. Аммо улардан икки нафари ҳужжатларни белгиланган муддатгача топширишга улгурган, лекин улар томонидан таклиф этилган нарх активнинг тахминий қийматидан паст бўлган.

Хусусийлаштириш жараёнида рақобат муҳитини таъминлаш мақсадида ДАБ аризаларни қабул қилишнинг янги муддатини 2025 йил 20 январгача белгилади.

«Автоойна» компанияси турли хил ўлчамдаги автомобиль ойналари (150 дан ортиқ тур) ишлаб чиқариш билан шуғулланади ва йиллик ишлаб чиқариш қуввати 420 минг донадан ортиқ маҳсулотни ташкил этади. Корхона Bystronic Glass (Швейцария), Cugher, Ctriulzi, Mario Argiro, Kera Glass (Италия), Glassrobots, Pilkington (Финляндия) ва Vetrotool (Испания) каби машҳур халқаро брендларнинг технологияларидан фойдаланади.

2024 йил июль ойида «Автоойна» ва Uz-Koram компанияларининг 100% акцияларини хусусийлаштириш жараёни бошланган эди. Илк бор активга қизиқиш билдириш бўйича аризаларни қабул қилиш муддати 27 августгача этиб белгиланган, лекин потенциал инвесторларнинг мурожаатлари туфайли муддат 4 сентябргача узайтирилган эди.