COSCO Logistics компанияси Ўзбекистонда логистика марказини ташкил этиш имкониятларини ўрганмоқда

Тошкент, Ўзбекистон (UzDaily.uz) — 24 сентябрь куни Ўзбекистон Республикаси Инвестициялар, саноат ва савдо вазири ўринбосари Илзат Касимов COSCO Shipping Logistics & Supply Chain Management компанияси бошқаруви раиси Тси Хайдун бошчилигидаги делегация билан учрашди.

COSCO Shipping Logistics & Supply Chain Management (COSCO Logistics) – дунё бўйлаб кенг кўламли логистика хизматлари ва таъминот занжирларини бошқаришни тақдим этувчи, СОССО Шиппинг Гроуп таркибига кирувчи халқаро компания.

Музокаралар давомида ўзбек томони мамлакатда яратилган қулай инвестиция муҳити, солиқ ва божхона имтиёзлари, шунингдек, транспорт-логистика инфратузилмасини ривожлантириш бўйича амалга оширилаётган чора-тадбирлар ҳақида маълумот берди.

Томонлар ҳамкорликни кенгайтириш истиқболлари, молиявий алоқалар ҳамда Ўзбекистонда замонавий COSCO логистика марказини барпо этиш режаларини муҳокама қилдилар.

Делегация олиб борилаётган ислоҳотларга юқори баҳо бериб, компаниянинг республикадаги ваколатхонасини очишга қизиқиш билдирди.