Centrum Air Деҳли – Тошкент йўналиши бўйича авиақатновларини йўлга қўяди

Тошкент, Ўзбекистон (UzDaily.uz) — Ўзбекистоннинг Centrum Air авиакомпанияси 2025 йил 2 октябрдан бошлаб Деҳли – Тошкент йўналиши бўйича тўғридан-тўғри мунтазам рейсларни амалга оширишини эълон қилди.

Компания маълумотига кўра, дастлаб парвозлар ҳафтасига икки марта — сешанба ва жума кунлари амалга оширилади. Бу эса Ҳиндистон ва Ўзбекистон ўртасида ҳаво алоқаларини мустаҳкамлаб, йўловчиларга қулай нархлар, маъқул жадвал ва барча шарт-шароитларга эга парвоз имкониятини яратади.

Барча рейслар замонавий Centrum Air лайнерларида амалга оширилади, бу эса хавфсизлик ва юқори даражадаги хизмат сифатини, ҳам туристлар, ҳам бизнес вакиллари учун кафолатлайди.

Авиакомпания паркида Airbus A320, A320neo, A321neo ҳамда кенг фюзеляжли A330-300 самолётлари мавжуд. Яқин истиқболда Centrum Air паркини кенгайтиришни режалаштирган: 2025 йил якунига қадар 14 та, 2026 йилга келиб эса 22 та ҳаво кемасига етиши кутилмоқда.

«Биз Деҳли ва Тошкент ўртасида тўғридан-тўғри ҳаво қатновини очаётганимиздан фахрланамиз. Бу йўналиш сайёҳлар учун қулайлик яратиши билан бирга, Ўзбекистоннинг Ҳиндистонни Марказий Осиё, Европа ва Яқин Шарқ билан боғлайдиган минтақавий хаб сифатидаги ролини мустаҳкамлайди», — деди авиакомпания асосчиси ва бош директори Абдулазиз Абдурахмонов.

Тўғридан-тўғри рейслардан ташқари, Деҳлидан йўловчилар Тошкент орқали қулай транзитлардан фойдаланиб, Олмаота, Москва, Новосибирск, Истанбул, Дубай, Тель-Авив ва Копенгагенга парвоз қилиш имкониятига эга бўладилар. Бу эса Тошкентнинг Марказий Осиёдаги транспорт маркази сифатидаги мавқеини янада кучайтиради.

Сўнгги йилларда Ўзбекистон туризм соҳасини жадал ривожлантириб, меҳмонларни Буюк Ипак йўли мероси, ЮНЕСКО Бутунжаҳон мероси рўйхатига киритилган шаҳарлари — Самарқанд, Бухоро ва Хива, шунингдек, кенгайиб бораётган бизнес ва инвестиция имкониятлари билан ўзига жалб этмоқда.

Туризм ва минтақавий алоқаларни ривожлантиришга давлатнинг устувор эътибори туфайли мамлакат Европа, Осиё ва Яқин Шарқ ўртасидаги асосий транспорт ва туризм дарвозаларидан бирига айланмоқда.