Тошкент, Ўзбекистон (UzDaily.uz) — Centrum Air компанияси ўзининг илк узоқ масофага мўлжалланган, кенг фюзеляжли Airbus A330−300 самолётини қабул қилди. Самолёт 30 апрель куни Бангкокдан Тошкент халқаро аэропортига етиб келди. Бу ҳақда авиакомпания матбуот хизмати хабар берди.

Centrum Air компаниясида маълум қилинишича, 347 йўловчига мўлжалланган Airbus A330 самолёти узоқ масофали рейсларни амалга ошириш ҳамда янги йўналишларни ўзлаштириш учун фойдаланилади.

Ҳозирда хусусий Centrum Air авиакомпанияси паркида саккизта самолёт мавжуд: бешта Airbus A320−200, иккита A321neo ва битта A330−300. Ушбу учув аппаратларининг ўртача ёши 13 йилдан биоз кўпроқни ташкил этади. Яқин вақт ичида компания яна учта янги самолёт қабул қилиши кутилмоқда.

Planespotters.net портали маълумотига кўра, ушбу самолёт 2009 йилнинг охирида Тулузада ишлаб чиқарилган. 2020 йилга қадар у Thai Airways авиакомпанияси таркибида парвоз қилган, аммо COVID-19 пандемияси бошланганидан сўнг 2024 йил сентябригача Бангкок аэропортида сақланиб турган.

Самолётнинг сўнгги эгаси Ирландиянинг Aergo Capital компанияси бўлган. Тахминларга кўра, Centrum Air ушбу самолётни лизинг асосида қабул қилган.