Бухорода автобусларда йўл ҳақини нақд пулда тўлаш тақиқланди

Тошкент, Ўзбекистон (UzDaily.uz) — Бухоро шаҳрида автобусларда йўл ҳақини нақд пулда тўлаш тақиқланди. Бу ҳақда Бухоро вилояти ҳокимлиги матбуот хизмати хабар берди.

Янги тартибни жорий этиш доирасида бир ой давомида шаҳарнинг барча автобус йўналишлари ва бекатларида электрон чипталарни сотиш учун автоматлаштирилган ўз-ўзига хизмат кўрсатувчи инфокиосклар ўрнатилади. Мазкур қарор Бухоро вилояти ҳокими Ботир Зарипов томонидан имзоланди.

Шаҳар автобус йўналишларида бир йўловчи учун йўл ҳақи электрон тўлов тизими орқали стандарт тартибда тўланганда ҚҚС билан бирга 3 000 сўмни ташкил этади.

АТТО тизими орқали рағбатлантирувчи чегирмадан фойдаланилганда тариф ҚҚС билан бирга 2 000 сўмгача камайади.

Шунингдек, сафарлар сонига қараб тариф режаларини ҳисоблаш учун чекланган тариф жорий этилган бўлиб, у ҳам ҳар бир сафар учун ҚҚС билан бирга 2 000 сўмни ташкил этади.