Бухорода 350 млн долларлик электромобиль заводи қурилади

Тошкент, Ўзбекистон (UzDaily.uz) — Бухоро вилоятининг Когон туманида электромобиллар ва гибрид автомобиллар ишлаб чиқариш заводини қуриш режалаштирилмоқда. Бу ҳақда Президент Шавкат Мирзиёев раислигида ўтказилган йиғилиш якунлари бўйича маълум қилинди.

Янги корхонанинг ишлаб чиқариш қуввати йилига 80 мингта автомобилга етиши кутилмоқда. Лойиҳани амалга ошириш натижасида тахминан 500 та янги иш ўрни яратилади, бу эса ҳудуд иқтисодий ривожига ижобий таъсир кўрсатади.

Мазкур лойиҳа Ўзбекистонда барқарор транспортни ривожлантириш ҳамда саноат соҳасига хорижий инвестицияларни жалб этиш стратегиясининг бир қисмига айланади.