Тошкент, Ўзбекистон (UzDaily.uz) — 3-6 февраль кунлари Ўзбекистон Республикаси Энергетика вазири Ж.Мирзамаҳмудов бошчилигидаги Ўзбекистон делегацияси амалий ташриф билан Словакияда бўлиб турибди.

Жорий йилнинг 4 февраль куни Ўзбекистон Савдо-саноат палатаси раиси ўринбосари Дилшод Расулов Словакия пойтахти Братислава шаҳрида икки мамлакат вазирлик ва идоралари, шунингдек, ишбилармон доира вакиллари иштирокида бўлиб ўтган Ўзбекистон-Словакия бизнес-форумида қатнашди. У ўз тақдимотида Ўзбекистоннинг инвестицион салоҳияти ва мавжуд имкониятларини намойиш этди.

Форум доирасида Словакиянинг етакчи “BEH - Food Processing Technologies” корхонаси директори Ладислав Хайко, “Vzduchotorg” корхонаси сотув директори Радослав Масарик, “Elteco Group” корхонаси бошқарувчиси Мирослав Кубала, шунингдек, “Tate & Lyle” ва “Any TM” корхоналари раҳбарияти билан музокаралар ўтказилди.

Учрашув чоғида Ўзбекистон Савдо-саноат палатаси ва тармоқ уюшмалари фаолияти ҳақида маълумот берилди, шунингдек, туризм ва фармацевтика соҳалари бўйича ҳамкорлик истиқболлари муҳокама қилинди.

Форум якунида Словакия компаниялари билан ўзаро манфаатли ҳамкорликни кенгайтириш юзасидан қатор G2B ва В2В ва учрашувлар бўлиб ўтди.