Бош прокуратура Aviator савдо марказидаги ёнғин бўйича жиноят иши қўзғатди

Тошкент, Ўзбекистон (UzDaily.uz) — Бош прокуратура пойтахтда жойлашган Aviator савдо марказида содир бўлган ёнғин факти бўйича жиноят иши қўзғатди, дея хабар қилди идора матбуот хизмати.

Тергов мансаб ваколатларини суиистеъмол қилиш, шунингдек, ёнғин хавфсизлиги қоидаларини бузиш билан боғлиқ моддалар бўйича олиб борилмоқда.

Ёнғин 31 январь куни савдо марказининг иккинчи қаватида, болалар ўйин зонаси ва фудкорт жойлашган ҳудудда содир бўлган. Gazeta.uz нашри маълумотларига кўра, ёнғин вақтида ушбу қаватда ёнғин сигнализацияси ва автоматик ёнғин ўчириш тизимлари ишламаган.

Ёнғинни бартараф этишга тахминан 200 нафар қутқарувчи ва ўнлаб махсус техника жалб этилди. Авария-қутқарув ишлари давомида савдо маркази яқинида автотранспорт ҳаракати вақтинча чекланди.

Ўчириш ишлари якунланганидан сўнг савдо мажмуаси ҳудудида 2023 йилда туғилган қизалоқнинг жасади топилган.