Тошкент, Ўзбекистон (UzDaily.uz) — Жорий йилнинг 28 февраль куни Ўзбекистон Республикаси Иқтисодиёт ва молия вазири ўринбосари Гулнора Рахимова ҳамда Бирлашган Миллатлар Ташкилоти Тараққиёт Дастурининг Ўзбекистондаги доимий вакили Акико Фужии ўртасида учрашув бўлиб ўтди.

Учрашувда БМТТДнинг Ўзбекистондаги ваколатхонасининг Самарали бошқарув кластери раҳбари Камила Муҳаммадханова ҳамда Иқтисодиёт ва молия вазирлигининг Кичик ва ўрта бизнес ривожланишини таҳлил қилиш, қўллаб-қувватлаш ва давлат сиёсатини мувофиқлаштириш департаменти директори Тимур Хусанов ва бошқа масъул вакиллар иштирок этди.

Мулоқот давомида томонлар мамлакатимизда амалга оширилаётган ижобий ўзгаришлар, ўзаро амалга ошираётган лойиҳаларининг жорий ҳолати, хусусан, истиқболдаги ҳамкорлик йўналишлари муҳокама қилинди.

Хусусан, тадбиркорликни ривожлантириш, жумладан, аёллар тадбиркорлигини қўллаб-қувватлаш, уларга яратилаётган имкониятлар, давлат харидлари соҳасида аёл тадбиркорларнинг малакасини ошириш масалаларига алоҳида тўхталиб ўтилди.

Учрашувда БМТ Тараққиёт Дастури, «Hamroh» хотин-қизлар тадбиркорлигини қўллаб-қувватлаш компанияси ҳамда Иқтисодиёт ва молия вазирлиги билан ҳамкорликда Аёллар тадбиркорлигини қўллаб-қувватлаш бўйича келишув имзоланди.

Мазкур лойиҳада Ўзбекистондаги тадбиркор аёллар ўртасида молиявий ва рақамли саводхонликни мустаҳкамлаш, аёллар бошчилигидаги кичик ва ўрта корхоналар учун молиялаштириш ҳамда бозорларга кириш имкониятини яхшилаш, улар учун янада инклюзив сиёсат муҳитини яратиш кўзда тутилган.

Музокаралар якунида томонлар ўзаро ҳамкорлик алоқаларини ривожлантириш ва янада мустаҳкамлашга келишиб олди.