Беларусь ва Ўзбекистон жиноятчиликка қарши курашда ҳамкорликни кучайтирмоқда

Тошкент, Ўзбекистон (UzDaily.uz) — Беларусь Тергов қўмитаси раиси Дмитрий Гора жиноятларни тергов қилиш соҳасида халқаро ҳамкорлик ва тажриба алмашинувини мустаҳкамлашга қаратилган ишчи учрашувни ўтказди. Учрашувда Ўзбекистон Ички ишлар вазирлиги Тергов департаменти бошлиғи Рамазон Ашропов бошчилигидаги делегация иштирок этди.

Музокаралар давомида томонлар кибержиноятчиликка қарши кураш, шунингдек ҳар икки давлатда самарали қўлланилаётган замонавий усул ва ёндашувларни жиноят ишларини тергов қилиш жараёнига жорий этиш каби кенг кўламли масалаларни муҳокама қилдилар.

Дмитрий Гора таъкидлашича, ўзаро ҳамкорлик ва тажриба алмашинуви замонавий таҳдидларга қарши самарали курашиш имконини беради.

Учрашув якунида ҳамкорлик тўғрисидаги меморандум имзоланди. Ҳужжат доирасида маълумот алмашинувини фаоллаштириш, жиноятларни тергов қилишда ўзаро ёрдам кўрсатиш, қўшма тезкор тадбирлар ўтказиш ҳамда услубий қўллаб-қувватлаш назарда тутилган.

Беларусь Тергов қўмитаси матбуот хизмати маълум қилишича, мазкур ҳужжат ҳар икки давлатнинг жиноят-процессуал соҳада амалий ҳамкорликка тайёрлигини тасдиқлайди.