Беларусь 2030 йилгача Ўзбекистон билан товар айланмасини 2 миллиард долларга етказишни режалаштирмоқда

Тошкент, Ўзбекистон (UzDaily.uz) — Беларусь Бош вазири Александр Турчин Ўзбекистон Бош вазири Абдулла Арипов билан учрашув чоғида икки давлат ўртасидаги иқтисодий ҳамкорликни сезиларли даражада кенгайтириш режалари борлигини маълум қилди.

Унинг сўзларига кўра, Ўзбекистон Марказий Осиёда ва ундан ташқари ҳудудларда ҳам Беларусь учун муҳим шериклардан бири ҳисобланади, муваффақиятли ҳамкорликнинг асосини эса давлат раҳбарлари ўртасидаги ишончли мулоқот ташкил этади.

«Ҳукумат олдидаги асосий вазифалар фақатгина эришилган келишувларнинг бажарилишини мониторинг қилиш ва назорат қилиш эмас, балки янги ташаббусларни босқичма-босқич ишлаб чиқиш, жумладан жорий йилда режалаштирилган олий даражадаги учрашувга тайёргарлик кўришдан иборат», — деди Александр Турчин.

Шавкат Мирзиёевнинг Беларусьга ташрифи арафасида икки томонлама ҳамкорлик харитасини тайёрлаш режалаштирилмоқда. Бош вазир икки мамлакат ўртасидаги товар айланмасини 2030 йилгача 2 миллиард долларга етказишдек улкан мақсад қўйилганини таъкидлади.

«Товар айланмаси ҳажми қарийб 1 миллиард долларга етди, бу эса иқтисодиётларимизда катта салоҳият мавжудлигидан далолат беради. Қатор йирик лойиҳалар амалга оширилмоқда», — дея қўшимча қилди у.