Тошкент, Ўзбекистон (UzDaily.uz) — Ҳозирги вақтда Фарғона вилояти Қўқон шаҳри ҳокимининг биринчи ўринбосари Немат Норматович Ҳамидов бошчилигидаги Ўзбекистон расмий делегацияси ишчи ташриф билан Башкортостанда бўлиб турибди.

Ташриф доирасида қўқонлик «R-A-M ORGANIZATION» компанияси Башкортостандан Ўзбекистонга маҳсулот етказиб бериш бўйича қатор шартномаларни имзолади.

Учрашувда томонлар Стерлитамак шаҳрида ўтган «Купец 2.0» фестивалида делегация иштирокининг натижаларини, шунингдек, Стерлитамак ва Қўқон шаҳарлари ўртасидаги ҳамкорлик йўл харитасида кўзда тутилган тадбирларни муҳокама қилди.

«Кўп йиллик самарали ҳамкорлик ҳудудларимизни саноат ва қишлоқ хўжалиги каби турли соҳаларда боғлаб келмоқда.

Башкортостан Россиянинг Ўзбекистон билан ташқи иқтисодий алоқаларида муҳим ўрин тутади. Қўқон компанияси билан янги шартномалар имзоланиши ўзбек ҳамкорлар билан ўзаро муносабатларда янги босқични очади», — деди Башкортостан Ҳукумати раиси ўринбосари, саноат, энергетика ва инновациялар вазири Александр Николаевич Шельдяев.

Музокаралар чоғида томонлар келгусидаги ҳамкорлик истиқболларини, жумладан, жорий йилда Башкортостан расмий делегациясининг Ўзбекистонга ташрифини ҳам муҳокама қилди.

«Биз мамлакатларимиз ўртасида иқтисодий ва тижорат ҳамкорлигини кучайтиришга қаратилган комплекс ҳаракатлар режасини амалга ошириш учун катта саъй-ҳаракатлар қилмоқдамиз. Янги шартномалар имзоланиши ҳар икки шаҳар ривожида ва икки томонлама алоқаларни мустаҳкамлашда муҳим босқич бўлади», — дея таъкидлади Башкортостан Республикасининг ташқи иқтисодий алоқалар ва конгресс фаолияти вазири Маргарита Болычева.