Тошкент, Ўзбекистон (UzDaily.uz) — Бирлашган Араб Амирликлари (БАА) суди раввин Цви Коганни ўлдирганликда айбланган уч нафар Ўзбекистон фуқаросини ўлим жазосига ҳукм қилди. Жиноятни ташкил этишда иштирок этган деб топилган яна бир шахс эса умрбод қамоқ жазосига ҳукм қилинди.

Раввин Цви Коган — Исроил ва Молдова фуқароси бўлиб, Абу-Дабидаги «Хабад» яҳудий ҳаракатининг вакили сифатида фаолият юритган. У 2020 йилда Исроил ва БАА ўртасидаги муносабатлар нормаллаштирилгандан кейин ушбу мамлакатга кўчиб келган. 2024 йил 21 ноябрда у алақага чиқмай қолган ва икки кундан кейин қидирувга берилган. Кейинчалик унинг жасади зўравонлик аломатлари билан топилган.

Марҳумнинг автомобили Абу-Дабидан 150 километр узоқликда, уруш излари билан аниқланган.

Бир неча кун ўтгач, ҳуқуқ-тартибот органлари уч нафар ўзбек фуқаросининг қўлга олингани ҳақида маълум қилди. Тергов давомида гумонланувчилар жабрдийда ҳаракатларини аввалдан кузатиб, уни ўлдиришни режалаштиргани аниқланган.

Суд жараёни Абу-Даби Федерал апелляция судининг давлат хавфсизлиги палатасида ўтказилиб, шу ерда ҳукм чиқарилган.

Маълумот ўрнида, БААда ўлим жазоси қонуний ҳисобланади. Мамлакат ҳуқуқий тизими исломий шариат қоидалари ва фуқаролик қонунчилиги асосида ишлайди. Унга кўра, қотиллик, терроризм, давлатга хиёнат, жосуслик ва гиёҳванд моддаларнинг ноқонуний айланмаси учун олий жазо — ўлим ҳукми қўлланилиши мумкин.

БААда ўлим ҳукми мажбурий тарзда қайта кўриб чиқилади ва тегишли амирлик ҳукмдори томонидан тасдиқланиши керак. Шу билан бирга, ҳукмлар камдан-кам ҳолларда ижро этилади, кўпинча улар умрбод қамоқ жазосига алмаштирилади. Агар ўлим жазоси ижро этилса, отиш орқали қатл қилиш усули қўлланилади.