Азамат Караматов IT Park Uzbekistan бош директори этиб тайинланди

Тошкент, Ўзбекистон (UzDaily.uz) — Азамат Караматов IT Park Uzbekistan бош директори лавозимига тайинланди. Ушбу лавозимни илгари Абдулахад Қўчқоров эгаллаб келган.

Янги лавозимда Караматов мамлакат IT-сектори ривожланишининг асосий йўналишларини амалга ошириш учун масъул бўлади. Бу вазифалар қаторига стартап-экотизим ва венчур бозорини қўллаб-қувватлаш, IT Park резидентлари билан ишлаш, шунингдек IT-хизматлар ва технологик маҳсулотлар экспортини кенгайтириш киради.

Унинг вазифалари доирасига, шунингдек, халқаро технологик компанияларни Ўзбекистонга жалб этиш, IT Park Uzbekistan фаолияти самарадорлигини ошириш ва рақамли иқтисодиёт соҳасидаги лойиҳаларни илгари суриш ҳам киради.

Караматов 2007–2013 йилларда Тошкент ахборот технологиялари университетида таҳсил олиб, бакалавр ва магистр даражаларини олган. 2016–2018 йилларда у Ўзбекистон Республикаси Президенти ҳузуридаги Давлат бошқаруви академиясида таълимини давом эттирган.

Меҳнат фаолияти давомида у рақамли технологиялар соҳасида турли лавозимларда ишлаган. Жумладан, Ўзбекистон Рақамли технологиялар вазирлигида раҳбарлик лавозимларида фаолият юритган, шунингдек хусусий секторда ҳам иш тажрибасига эга.

Шу давр мобайнида Караматов IT-инфратузилмани ривожлантириш, норматив-ҳуқуқий базани такомиллаштириш, инновацион лойиҳаларни амалга ошириш, стартапларни қўллаб-қувватлаш ва инвестицияларни жалб этиш соҳаларида тажриба тўплаган.

IT Park Uzbekistan бош директори лавозимига тайинланишидан олдин у IT Park Ventures компаниясига раҳбарлик қилган. Унинг раҳбарлигида фонд минтақадаги энг йирик стартап-портфеллардан бирини шакллантирди, халқаро ҳамкорлар билан қўшма венчур фондларини ташкил этиш ташаббусини илгари сурди ҳамда тадбиркорликни ривожлантириш, IT-мутахассисларини тайёрлаш ва стартапларни глобал бозорларга олиб чиқишга қаратилган дастурларни ишга туширишда иштирок этди.

Шу билан бирга IT Park Uzbekistan раҳбариятининг янгиланган таркиби ҳам тақдим этилди. Бош директорнинг биринчи ўринбосари лавозимига Жаҳонгир Ражабов Ихтиёр ўғли тайинланди. Резидентлар билан ишлаш бўйича директор этиб Лазизбек Худаев Иброхимович, стратегик ривожланиш бўйича директор этиб Маҳлиёхон Муксинова Азизжон қизи тайинланди.

Инклюзив ривожланиш йўналишига Дилафруз Миралимова Абдулла қизираҳбарлик қилади, минтақавий ривожланиш учун эса Азам Абдуллаев Абдушукурович масъул бўлади.

Кутилишича, янгиланган бошқарув жамоаси IT Park Uzbekistan фаолиятини янада кенгайтиришга, IT-хизматлар ва маҳсулотлар экспортини оширишга, стартап-экотизимни ривожлантиришга ҳамда мамлакатнинг глобал технологик бозордаги мавқеини мустаҳкамлашга хизмат қилади.